Usı kúnlerde Oliy Majlis Nızamshılıq palatasındaǵı komitetler májilislerinde Mámleketlik byudjettiń hám mámleketlik maqsetli qorları byudjetleriniń 2025-jıl birinshi yarım jıllıǵındaǵı orınlanıwı dáslepki túrde kórip shıǵılmaqta.

Sonıń ishinde, Ilim, bilimlendiriw, mádeniyat, sport hám jaslar máseleleri komitetiniń májilisinde komitet aǵzaları esabat dáwirinde bilimlendiriw sisteması mákemelerin saqlaw hám olardı rawajlandırıw qárejetlerine ajıratılǵan qarjılardıń qay dárejede maqsetli jumsalǵanına itibar qarattı.
Atap ótilgenindey, bilimlendiriw tarawındaǵı qárejetlerdiń 70 procenti ulıwma bilimlendiriwge, 18 procenti mektepke shekemgi bilimlendiriwge hám 12 procenti kadrlar tayarlawǵa qaratılǵan. Kadrlar tayarlaw tarawına 5 trillion sum yamasa bilimlendiriw tarawı qárejetleriniń 11,8 procenti qaratılǵan. Bul tarawdıń jáne bir bólegi bolǵan joqarı bilimlendiriw mákemelerin saqlaw qárejetleri ushın esabat dáwirinde 2,8 trillion sum yamasa ótken jıldıń sáykes dáwirine salıstırǵanda 20 procentke kóp qárejetler ámelge asırılǵan.
Sonday-aq, dodalawlarda mádeniyat, kórkem óner hám sport tarawların qarjılandırıw, kitapxanalardı saqlawǵa baǵdarlanǵan qarjılarǵa da toqtap ótildi.
***
Demokratiyalıq institutlar hám puqaralıq jámiyeti institutların rawajlandırıw máseleleri komitetiniń májilisinde bolsa Mámleketlik byudjettiń yarım jıllıqtaǵı orınlanıwı tallaw-sın kózqarasta kórip shıǵıldı. Komitettiń baǵdarınan kelip shıǵıp, deputatlar Mámleketlik byudjet parametrlerinde mámleket tárepinen puqaralıq jámiyeti institutların qollap-quwatlaw, sonıń ishinde, ózin-ózi basqarıw uyımların saqlaw qárejetleri, sonday-aq, gender máseleleri boyınsha qárejetlerge ayrıqsha itibar qarattı.
Deputatlar unamlı nátiyjeler menen birge, byudjet qarjılarınan maqsetli paydalanıw boyınsha ayırım kemshiliklerge jol qoyılǵanın atap ótip, bir qatar usınıslar berdi.

Muhtarama Komilova, ÓzA