Paytaxtımızdaǵı Súwretlew kórkem óneri galereyasında Ózbekstan xalıq xudojnigi Oral Tansıqbaev tuwılǵanınıń 120 jıllıǵına baǵıshlanǵan yubiley kórgizbe óz jumısın basladı.

Ózbekstan Respublikası Mádeniyat hám kórkem ónerdi rawajlandırıw qorı tárepinen shólkemlestirilgen ekspoziciyada xudojniktiń 124 shıǵarması qoyılmaqta. Olardan 106 cı I.V.Savickiy atındaǵı Qaraqalpaqstan mámleketlik kórkem óner muzeyi, Ózbekstan mámleketlik kórkem óner muzeyi hám Oral Tansıqbaev úy-muzeyi kollekciyalarınan, sonday-aq, 18 dóretpe A.Qasteev atındaǵı Qazaqstan mámleketlik kórkem óner muzeyinen alınǵan.
1904-1974-jıllar aralıǵında jasap dóretiwshilik etken Oral Tansıqbaev xudojnik hám jivopis sheberi bolǵan. “Gúres”, “Kárwan”, “Otaw”, “Ózbekstanda báhár” sıyaqlı onlaǵan belgili shıǵarmaları bar. Xudojniktiń dóretpeleri Ózbekstan, Moskva, soniń ishinde, 1934-jılı AQShtıń Filadelfiya qalasında da kórgizbege qoyılǵan.
– Oral Tańsıqbaevtıń dóretiwshilik úlgilerinen onıń qorshaǵan ortalıqqa bolǵan súyispenshiligin seziw múmkin. Xudojniktiń jigirmalanshı jıllardıń bası, otızınshı jıllar aqırındaǵı jumısların dıqqat penen úyreniw arqalı ondaǵı jasırın umtılıslardı sezemiz. Kóplegen faktorlar sebepli Tansıqbaev avangard baǵdarına qaray jedel rawajlanǵan. 1968-jılı xudojnik I.V.Savickiy tárepinen saylap alınǵan 150 den aslam dóretpelerin Nókis muzeyi kollekciyasına biyǵárez tapsırǵan, – dedi I.V.Savickiy atındaǵı Qaraqalpaqstan mámleketlik kórkem óner muzeyiniń direktorı Gúlbáhár Izentaeva ÓzAnıń xabarshısına bergen intervyuinde.
Kórgizbe aldınan Mádeniyat hám kórkem ónerdi rawajlandırıw qorı 70 ten aslam kartinanı restavraciyalawǵa kiristi hám bul processke jetekshi francuz qánigeleri tartıldı. Sonday-aq, xudojniktiń yubileyi múnásibeti menen Italiyanıń Electa Publishing baspası menen birgelikte kórgizbeniń ilimiy katalogi de tayarlanbaqta.
Kórgizbe 20-noyabrge shekem dawam etedi.

Behruz XUDOYBERDIEV, Asliddin ALIJONOV (foto), ÓzA