Jınayat isleri boyınsha Kegeyli rayonı sudınıń baslıǵı R.Bekmuratova tárepinen rayon hákimliginde aymaqtaǵı tiyisli mákeme hám shólkemlerdiń basshıları, máhálle baslıqları menen ushırasıw ótkerildi.

Onda usı jıldıń 21-avgust kúni qabıl etilgen «Sudlardıń jumısına jasalma intellekt texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı qosımsha ilajlar haqqında»ǵı 140-sanlı Prezidentimiz Pármanı hám onıń áhmiyeti haqqında sóz boldı.
Atap ótilgenindey, bul Párman sud sistemasında ashıq-aydınlıq hám zamanagóy texnologiyalardan nátiyjeli paydalanıwdı támiyinlewge xızmet etedi. Sonıń ishinde, sud jumısına jasalma intellektti engiziw arqalı is júrgiziwde operativlik hám qalıslıqqa erisiw, puqaralardıń huqıqları menen máplerin nátiyjeli qorǵaw imkaniyatlarınıń keńeyip atırǵanı ayrıqsha atap ótildi.
Ushırasıw dawamında sud hújjetleriniń orınlanıwın támiyinlew, atap aytqanda, ayrıqsha uyǵarıwlardıń tolıq hám óz waqtında kórip shıǵılıwı boyınsha juwapker shólkemler hám máhálle basshılarına anıq wazıypalar júklendi.
Ilajda Sud baslıǵı R.Bekmuratova sud qararlarınıń orınlanıwın támiyinlewde hár bir basshı hám puqaralardıń huqıqıy sanası hám juwapkershiligi áhmiyetli orın iyeleytuǵının, sol arqalı jınayatshılıqtı saplastırıwda sistemalı múnásibet qáliplesetuǵının atap ótti.
Ushırasıw juwmaǵında, sud hám jergilikli uyımlar arasında birge islesiwdi jáne de bekkemlew, jámiyetshiliktiń qatnasıwında huqıqbuzarlıqlardıń aldın alıw boyınsha anıq ilajlar belgilendi.

Adilbay Orazov,
Qaraqalpaqstan xabar agentligi sholıwshısı