Joqarı bilimlendiriw, ilim hám innovaciyalar ministriniń tiyisli buyrıǵı tiykarında 2025-2026-oqıw jılında joqarı oqıw orınlarına qabıl etilgen 1-kurs studentleri ushın oqıw processleri 3-sentyabrden baslanıwı belgilengen bolıp, usı tiykarda búgin Berdaq atındaǵı Qaraqalpaq mámleketlik universitetinde de student bolıw baxtına miyasar bolǵan birinshi kurs studentleri ushın oqıw procesi baslandı.

Tań sáhárden ullı dárgayǵa asıǵıp kiyatırǵan jaslardıń júzindegi quwanısh, kózlerindegi jarqın arzıwlar, bilim alıwǵa bolǵan umtılısları elimizdiń keleshegine bolǵan isenimdi jáne de bekkemleydi. Sebebi búgingi baxıtlı jaslar – erteńgi kúnniń jetik qánigeleri, jámiyet rawajlanıwınıń bas faktorı bolıp esaplanadı.
Oqıw ornınıń keń hám ıqsham auditoriyaları, zamanagóy laboratoriyaları, bay kitapxanası jaslardıń ilimge bolǵan qızıǵıwshılıǵın jáne de arttıradı. Olar bul jerde tek ǵana bilim emes, al turmıslıq tájiriybe, doslıq hám awızbirshilikti de ózlestiredi.
-Universitettiń yuridika fakultetine grant tiykarında oqıwǵa qabıllandım, Búgin joqarı oqıw ornına birinshi márte qádem taslap atırman. Ájayıp ortalıq, jańa doslar diydarı adamdı ózine tartıp turadı. Oqıw ornındaǵı jaslardıń bilim alıwı ushın jaratılǵan imkaniyatlardı kórip kewlim quwanıshqa tolmaqta. Usı imkaniyatlardan orınlı paydalanıp, ustazlardan bilim alıp, keleshekte elimizge xızmet etip, múnásip perzent bolıwǵa háreket etemen,-deydi Adilbek Rısnazarov.
Usı jerde Prezidentimiz tárepinen jaslar ushın jaratılıp atırǵan sharayatlar menen imkaniyatlardı ayrıqsha atap ótiw kerek. Hár bir tarawda olarǵa keńnen jol ashıp berilip atırǵanı, studentlerdiń óz potencialın júzege shıǵarıwı ushın barlıq zárúr infrastruktura jaratılǵanı – jaslarımızdı baxıtlı etip atırǵan faktorlardan bolıp esaplanadı. Álbette, bul búgin oqıw ornına úlken arzıw úmitler menen qádem taslap atırǵan hár bir jastıń qálbinde maqtanısh sezimlerin oyatıp, bunday imkaniyatlardan orınlı paydalanıp, elimizdiń múnásip perzentleri bolıp jetisip shıǵadı, dep oylaymız.
Oqıw ornındaǵı fakultetlerde «Studentlikke baǵıshlaw» ilajları ótkerilip, onda studentlerdi universitettiń jumısı menen tanıstırıw, kredit-modul sistemasınıń mazmun-mánisi hám abzallıqların túsindiriw jáne tańlaw pánlerin maqsetli tańlaw, studentlerde erkin bilim alıw kónlikpelerin qáliplestiriw, akademiyalıq ádillik principleri jáne kásiplik hám jeke rawajlanıw máseleleri boyınsha úgit-násiyat jumısları alıp barıldı.

Qaraqalpaqstan xabar agentligi