Máhálle – bul xalqımız turmısınıń, úrp-ádet hám qádiriyatlarınıń orayı esaplanadı. Mine, usınday ullı qádiriyatlar orayı bolǵan máhállelerge Prezidentimiz tárepinen ayrıqsha itibar qaratılıp, xalıqtıń turmıs tárizin jaqsılaw, bunda puqaralar menen tikkeley islesiwshi máhálle institutın jetilistiriw, onıń sistemalı jumıs alıp barıwı ushın qolaylı sharayatlar jaratıw boyınsha keń kólemli jumıslar ámelge asırılmaqta.

Usınday iygilikli jumıslardıń dawamı sıpatında Ózbekstan Respublikası Prezidentiniń 2022-jıl 25-oktyabrdegi «2022-2023-jıllarda máhálleler infrastrukturasın jáne de jaqsılaw boyınsha qosımsha ilajlar haqqında» ǵı qararı tiykarında Nókis qalasında 25 mákan puqaralar jıyınlarınıń imaratı jańadan qurıldı.
Eń ullı hám eń áziz bayram qarsańında bir kúnde 25 máhálleniń zamanagóy tiptegi imaratınıń paydalanıwǵa tapsırılıwı – «Watan ushın, millet ushın, xalıq ushın!» degen súrenniń ayqın kórinisi boldı.
Usı múnásibet penen bolıp ótken ilajlar sheńberinde Qaraqalpaqstan Respublikası Joqarǵı Keńesiniń Komitet baslıǵı Sh.Ótemisov, Máhálleler associaciyası Qaraqalpaqstan Respublikası basqarmasınıń baslıǵı S.Turmanov, Nókis qalası hákimi A.Dániyarov, keń jámiyetshilik wákilleri hám máhálle xalqı qatnastı.
Atap ótilgenindey, Tashkent qalası hákimliginiń qáwenderliginde qurıp pitkerilgen jańa tiptegi máhálle imaratları keleshekte máhálle jetiliginiń ele de xalıq penen tıǵız islesiwine tiykar jaratadı.
Sonday-aq, sońǵı jıllarda máhállelerimiz úlken jańalanıw, kurılıs maydanlarına aylanıp ketti. Xalıq penen tıǵız birge islesiwde xalıqshıllıq principi keń en jayıp, puqaralardıń ǵárezsizligimiz bergen búgingi ózgerislerge shúkirshilik jáne maqtanısh sezimleri artıp barmaqta.
Bunda álbette, mámleketimizdiń tiykarǵı ózegi bolǵan – máhálelerdegi máhálle jetiliginiń nátiyjeli jumıs alıp barıwın támiyinlewge keń dıqqat awdarılmaqta. Jıldan jılǵa jańa máhálle imaratları boy tiklep, bul jańalanıwlar máhálleniń mámleket hám xalıq arasındaǵı shın mánisindegi bekkem kópir bolıwın támiyinlep atır.
Jańa imaratları tapsırılǵan máhálleler qatarında “Nawqan baǵ”, “Shıǵıs”, “Turan”, “Dárbent”, “Gúzar”, Jayxun hám “Kók ózek” sıyaqlı máhálelerdi atap ótiwimizge boladı.
Ilajda jıynalǵanlar jańa máhálle imaratındaǵı jetilik aǵzaları hám máhálle xalqına jaratılǵan imkaniyatlar menen tanıstı. Jası úlkenler pátiyaǵa qol jayıp, jaratılıp atırǵan imkaniyatlar ushın Húrmetli Prezidentimizge jáne el basshılarına tereń minnetdarshılıq bildirdi.

Qaraqalpaqstan xabar agentligi