Qaraqalpaqstan medicina institutında 350 orınlıq jańa studentler turaq jayı paydalanıwǵa tapsırıldı. Saltanatlı ilajda institut jámááti, professor-oqıtıwshılar, student-jaslar hám ǵalaba xabar qurallarınıń wákilleri qatnastı.

Saltanatlı ilajda usı institut rektorı O.Halimov shıǵıp sóylep, jaslar ushın jaratılǵan sharayatlar, atap aytqanda, studentlerdi turaq jay menen támiyinlewge qaratılǵan jumıslarǵa toqtap ótip, bársheni usı quwanıshlı waqıya menen qutlıqladı.
Ózbekstan Respublikasında joqarı bilimlendiriw sistemasında ámelge asırılıp atırǵan keń kólemli reformalar sheńberinde student-jaslardı qolaylı jasaw sharayatları menen támiyinlew máselesine ayrıqsha itibar qaratılmaqta. Bul turaq jaydıń mámleketlik ǵárezsizligimizdiń 34 jıllıǵı aldında paydalanıwǵa tapsırılıwı student-jaslar ushın úlken sawǵa boldı.
Bul baǵdardaǵı háreketler “Ózbekstan – 2030” strategiyasına muwapıq, 2030-jılǵa shekem qosımsha 150 mıń orınlıq studentler turaq jayların qurıw wazıypaları menen úzliksiz baylanıslı.
Instituttıń studentler turaq jayın qurıw hám paydalanıwǵa tapsırıw – alıs aymaqlardan kelgen hám kem támiyinlengen studentler ushın qolaylı hám qáwipsiz bilimlendiriw ortalıǵın jaratıw, olardıń oqıwǵa bolǵan imkaniyatların keńeytiw bolıp esaplanadı. Turaq jayda hár bir xana 3 yamasa 4 studentke mólsherlengen bolıp, ol óz aldına xanalar sisteması tiykarında shólkemlestirilgen.
Sekciya ishinde, óz aldına zamanagóy asxana, sanuzel hám dush kabinaları, joqarı sapalı turmıslıq texnika hám mebeller, ısıtıw-suwıtıw sistemaları bar.
Ońlaw jumıslarına instituttıń byudjetten tısqarı qarjıları esabınan 6 mlrd. sumǵa shamalas qarjı jumsaldı. Studentler turaq jayında jaratılatuǵın qolaylı sharayatlar studentlerdiń bilim alıw procesin jáne de nátiyjeli hám mazmunlı shólkemlestiriwge xızmet etedi.

Qaraqalpaqstan xabar agentligi