Búgingi kúnde aymaqlardaǵı sociallıq-ekonomikalıq mashqalalardı sheshiw hám mámleketimizde bolıp atırǵan reformalar procesinde puqaralıq jámiyeti institutlarınıń qatnasın arttırıw úlken áhmiyetke iye bolmaqta. Házirgi kúnge shekem tarawǵa baylanıslı 200 den aslam normativlik-huqıqıy hújjetler qabıl etilip, mámleketlik emes sektordıń huqıqıy kepillikleri jaratılǵan. Atap aytqanda, “Mámleketlik emes kommerciyalıq emes shólkemler jumısınıń kepillikleri haqqında”ǵı nızamda mámleketlik emes kommerciyalıq emes shólkemlerdiń jumısın subsidiyalar, grantlar hám sociallıq buyırtpalar túrinde qollap-quwatlawı múmkin ekenligi názerde tutılǵan.

Jaqında Oliy Majlis Nızamshılıq palatasınıń Demokratiyalıq institutlar hám puqaralıq jámiyetin rawajlandırıw máseleleri komiteti tárepinen usı nızamnıń 11-statyasınıń Nawayı hám Qashqadárya wálayatlarındaǵı orınlanıwı qadaǵalaw-tallaw tártibinde úyrenildi. Bul úyreniw juwmaqları komitettiń keńeytilgen májilisinde dodalandı.
Májiliste atap ótilgenindey, usı jıldıń 1-iyul jaǵdayına Nawayı wálayatında jámi 504 MKSh Ádillik basqarmasınan dizimnen ótken. 2025-jılı Oliy Majlis janındaǵı Puqaralıq jámiyeti institutların qollap-quwatlaw jámiyetlik fondınıń Nawayı wálayatlıq bólimine mámleketlik grantqa 1 milliard 191 million 657 mıń sum, mámleketlik subsidiya ushın 2 milliard 554 million 170 mıń sum ajıratılǵanı aytıp ótildi.
Qashqadárya wálayatında 1-avgust jaǵdayına jámi 598 MKSh Ádillik basqarmasınan dizimnen ótken. Fondtıń Qashqadárya wálayatlıq bólimine mámleketlik grant ushın 310 million sum, mámleketlik subsidiya ushın 3 milliard 837 million 300 mıń sum qarjı ajıratılǵanı atap ótildi.
Deputatlar nızamnıń orınlanıwın támiyinlew baǵdarında ámelge asırılǵan jumıslar menen birge, grant joybarların ámelge asırıw procesinde olardıń dawamlılıǵın támiyinlew máselesinde jergilikli shólkemler hám xalıq penen nátiyjeli integraciyaǵa jeterli itibar qaratılmaǵanın atap ótti. – Hár eki wálayattaǵı úyreniwlerimiz dawamında mámleketlik emes kommerciyalıq emes shólkemlerdiń jumısı menen tanıstıq, – deydi komitet aǵzası Imomnazar Tursunov. – Ajıratılǵan subsidiyalar, grantlar hám sociallıq buyırtpalar túrindegi qarjılardan maqsetli paydalanıw jaǵdayına itibar qarattıq. Bárinen burın, bul qarjılar jámiyettegi sociallıq ortalıqtı jaqsılaw, xalıqtıń abadanlıǵın támiyinlew, kámbaǵallıqtı qısqartıw, mayıplıǵı bolǵan puqaralardı qollap-quwatlaw, sonday-aq, jańa tuwılǵan nárestelerdi saqlap qalıw, kóshelerdi jaqtılandırıwlar menen támiyinlew sıyaqlı maqsetlerge ajıratılǵan. Bul baǵdarda ámelge asırılǵan jumıslar menen tanıstıq. Sonıń menen birge, qarjılardıń nızamsız jumsalǵanı yamasa belgilengen waqtında ajıratılmaǵanı sıyaqlı kemshilikler de baqlandı.
Dodalawlarda mámleketlik grant tańlawların járiyalawda sociallıq tarawdaǵı áhmiyetli mashqalalardı sheshiwge itibardı kúsheytiw, qurılıs hám ońlaw jumısların ámelge asırıp atırǵan MKShlar ushın joybarlaw-smeta hújjetlerin tayarlaw qárejetlerin keleshektegi grant hám subsidiya tańlawlarınıń shártlerine ayrıqsha bánt sıpatında kirgiziw boyınsha zárúr usınıslar berildi.
Sonıń menen birge, hár bir grant joybarı ushın qarjı esabatların Birden-bir elektron platforma arqalı usınıw sistemasın engiziw, grant qarjılarınan nátiyjeli, maqsetli hám ashıq-aydın paydalanıw boyınsha MKShlar ushın turaqlı tájiriybe arttırıw kursların shólkemlestiriw zárúr ekenligi atap ótildi..

Muhtarama Komilova,
Doniyor Yoqubov, Anvar Ahmedov (video),
ÓzA