Xalqımızda ázelden shembilik tek ǵana birgelikte miynet etiw emes, al awızbirshilik, miyrim-shápáát sıyaqlı iygilikli qádiriyatlardı bekkemlewdiń úlgisi bolıp kelgen. Búgingi kúnde de bul dástúr zaman menen únles halda jáne de bayıp, milliy qádiriyatlarımızdıń ajıralmas bólegine aylanǵan.

Ilimiy izertlewler sonı kórsetedi, qorshaǵan ortalıqtıń tazalıǵı insan salamatlıǵı menen tikkeley baylanıslı. Taza hawa, taza kósheler hám jasıl aymaqlar dem alıw jollari kesellikleriniń aldın alıwǵa, ruwxıy salamatlıqtı bekkemlewge, infekciyalıq keselliklerdiń tarqalıwın sheklewge, júrek-qan tamır sistemasına unamlı tásir kórsetiwge xızmet etedi.
Sonıń ushın abadanlastırıw hám kóklemzarlastırıw jumısları tek ǵana aymaǵımızdıń shırayın ashıp ǵana qoymastan, al salamat turmıs táriziniń tiykarǵı kepilliklerinen biri bolıp esaplanadı.
Usı maqsette, búgin Qaraqalpaqstan medicina institutı jámááti de “Abat hám payızlı máhálle – elimiz kórki” súreni astında shembilik ilajlarında belsene qatnastı. Instituttıń bas imaratı hám aymaǵında keń kólemli abadanlastırıw jumısları alıp barılıp, tereklerge forma beriw, jol shetleri hám tosıqlardı háklew, kóklemzarlastırıw jumısları ámelge asırıldı. Bul jumıslar jáne de dawam etedi.

Qaraqalpaqstan xabar agentligi