Qanlıkól rayonında fermer xojalıqları hám basqa da awıl xojalıǵı kárxanaları basshılarınıń qatnasıwında awıl xojalıǵı tarawında ámelge asırılıp atırǵan wazıypalarǵa arnalǵan ámeliy oqıw seminarı ótkerildi.

Onda Ózbekstan Respublikası Prezidenti hám Ministrler Kabineti tárepinen qabıl etilgen qararlar, pármanlar hám basqa da normativlik huqıqıy hújjetlerdiń mazmun-mánisi, isbilermenlik subektlerine berilip atırǵan jeńillikler haqqında maǵlıwmatlar berildi.
Seminarda Qaraqalpaqstan Respublikası Ministrler Keńesi Baslıǵınıń Awıl hám suw xojalıǵı máseleleri boyınsha orınbasarı Sh.Teshaev, rayon hákimi B.Sultanov hám basqalar rayonda awıl-xojalıǵı jumıslarınıń barısına toqtap ótip, pikir-usınıslar bildirildi.
Atap ótilgenindey, rayonda paxta hám ǵálle jetistiriw boyınsha bir qansha jetiskenlikler menen bir qatarda kemshiliklerge de jol qoyılmaqta.
Seminarda tarawdı rawajlandırıw, diyqanshılıqta joqarı nátiyjege erisiw boyınsha ilajlar belgilendi.
Usınday seminar Kegeyli rayonında da bolıp ótip, awıl xojalıǵı tarawındaǵı áhmiyetli wazıypalar dodalandı.
Qaraqalpaqstan Respublikası Ministrler Keńesi Baslıǵınıń orınbasarı Sh.Teshaev basshılıǵında ótkerilgen seminarda rayonlıq fermer hám diyxan xojalıqlarınıń basshıları, awıl xojalıǵı qánigeleri qatnastı.
Seminarda ǵálle egiletuǵın maydanlardı lazerli tegislew arqalı suwǵarıwdı nátiyjeli shólkemlestiriw, suwdan aqılǵa uǵras paydalanıw hám zúráátlilikti arttırıw máseleleri kórip shıǵıldı. Fermerlerge ámeliy járdem kórsetiw, olardıń mashqalaların óz waqtında sheshiw boyınsha tapsırmalar berildi.
Usı tayarlıq ilajları rayonda ǵálle zúráátin kóbeytiw hám xalıqtı nan ónimleri menen támiyinlewge xızmet etedi.

Á.Jiyemuratov,
Qaraqalpaqstan xabar agentligi.