Watan ushın, millet ushın, xalıq ushın!

Ózim fermer bolǵanım ushın ázelden avgust ayın jaqsı kóremen! Paxtanıń zúráátke qosılıw dáwiri, ovoщ-palız, baǵdaǵı miyweler pisken hám zúráát jıynawǵa kirisetuǵın basqısh bolǵanı ushın ba, baǵman hám diyqanlar bul aydı jaqsı kóredi.
Sonday-aq, sońǵı jılları Prezidentimizdiń baslaması menen 20-avgust – mámleketimizde “Isbilermenler kúni” sıpatında belgilengeni fermerlerdiń de jańalıqlar kútetuǵın bayramına aylanǵan.
Shańaraq aǵzalarımız benen shólkemlestirgen “Arzıw” fermer xojalıǵın 2014-jıldan berli basqarıp kelemen. Xojalıǵımızdıń ulıwma jer maydanı 578 gektardı, sonnan egislik maydanı 175 gektardı qurap, 44 adam turaqlı jumıs penen támiyinlengen.
Ótken jılı 37 gektar maydanda paxta jetistirip, mámleketke paxta satıw rejesin 102 procentke orınladıq. Sonday-aq, 60 gektar maydanǵa dán egip, 169 tonna ǵálle tapsırdıq.
Fermerlerge jaratılǵan sharayatlar tiykarında biz de jumısımızdı barǵan sayın keńeytip barmaqtamız. Házirgi waqıtta fermer xojalıǵımızda 50 bas qaramal, 28 bas buzaw, 60 bas qoy, 100 ge shamalas qus baǵılmaqta.
Sonıń menen birge, búgingi kúnde 60 gektar maydanda boyan tamırın jetistiriw boyınsha plantaciya shólkemlestirilgen. Dáslepki maydanlarda 6 jıldan berli ósip rawajlanǵan boyan tamırı házir tayar ónim jaǵdayına keldi. Bul baǵdarda da 14 adamnıń bántligi támiyinlengen.
Hár jılı alınǵan dáramattı esaplaymız. Fermer xojalıǵımız keyingi úsh jılda jámi 1 832,5 mln. sum dáramat, texnikalardıń lizing hám kredit qarızların qaytarıw hám basqa da qárejetlerden hár jılı 500 million sumǵa shamalas sap payda menen juwmaqlap kiyatırmız. Xojalıǵımızǵa joqarı ónimdarlı egin maydanların súriwshi texnikalardan baslap, zamanagóy joqarı agregatlarǵa shekem alǵanbız.
Ózim reti kelgende esapshı, jumısshı hám mexanizator bolıp traktorlardı basqarıp kete beremen. Ómirlik joldasım hám 5 perzentim, shańaraǵımız aǵzalarınıń hár biri maǵan qol-qanat.
Fermerlik jumısımda erisken nátiyjelerim menen tańlawlarda qatnasıp kelmektemen. 2021-jılı Respublikalıq Hayal-qızlar jámiyetlik keńesi tárepinen ótkerilgen “Jıl hayalı – 2021” milliy tańlawınıń Respublikalıq basqıshında Gran-pri jeńimpazı bolıp, Prezident sawǵası “Jentra” avtomobili menen sıylıqlandım.
Sawǵa fermer xojalıǵımızdıń jańa tarmaqların rawajlandırıwǵa túrtki boldı. 2022-jılı óz esabımızdan 600 túp miywe nállerin egip, “Analar baǵı”n shólkemlestirgen edik. Kelesi jılı Jáhán bankiniń “Aralboyı regionınıń klimat ózgeriwin jumsartıw joybarı” boyınsha ózimniń biznes rejem menen qatnasıp, 600 mln grant utıp alıwǵa miyasar boldım.
Túrkiya mámleketinen 7 mıń 250 túp joqarı túrdegi qaramıq náli alıp kelinip, 8 gektar maydanǵa egildi hám búgingi kúnde olarǵa tárbiya berip atırmız. Ótken jılı da awıl xojalıǵın rawajlandırıw boyınsha xalıqaralıq grant tańlawlarında biznes rejemiz benen qatnasıp 200 million sum grant iyesi bolıp, 1 gektar maydanda jańa baǵ jaratıldı. Usı tárizde baǵshılıq tarmaǵımız barǵan sayın keńeyip rawajlanbaqta.
Endi, un hám nan ónimlerin islep shıǵarıw ústinde jumıs alıp barmaqtamız. Bunıń ushın bankten 300 mln sum kredit alıp, qurılısların basladıq. Qullası, ǵálleni jetistiriwden tayar ónimge shekemgi processlerdi ózimiz shólkemlestirip, xalqımız dasturxanına jetkeriwdi maqset etip aldıq.
Prezidentimizdiń “Isbilermenler kúni múnásibeti menen taraw wákillerinen bir toparın sıylıqlaw haqqında”ǵı Pármanı menen “Dwstlik” ordeni menen sıylıqlandım. Bul isenim jámáátimizdi aldımızǵa qoyǵan maqsetlerimizdi ámelge asırıwǵa, awıl xojalıǵı ónimlerin jetistirip, tek ǵana jergilikli bazardı támiyinlew emes, al eksportqa shıǵarıwǵa háreket etiwge kúsh-ǵayrat baǵıshlaydı.

Palzada Salieva,
Kegeyli rayonındaǵı “Arzıw” kóp tarmaqlı fermer xojalıǵınıń baslıǵı, “Dwstlik” ordeniniń iyesi.

Qaraqalpaqstan xabar agentligi