Usı jıldıń 18-19-avgust kúnleri “Yuksalish” háreketi tárepinen, Ózbekstan Notarial palatası menen birgelikte “Notariuslerden biypul huqıqıy bilimler!” súreni astında gezektegi akciyanı ótkeriw rejelestirilgen bolıp, maqset – puqaralardıń huqıqıy mádeniyatın arttırıw, xalıq penen pikirlesiw mexanizmin jaratıw, huqıqtı qollanıw tarawında mashqalalardı anıqlaw hám olardı saplastırıwǵa qaratılǵan pikir-usınıslardı tayarlaw, sonday-aq, puqaralarǵa hár qıylı huqıqıy mashqalalı máselelerde ámeliy járdem kórsetiwden ibarat.

Bul retki akciya Taqıyatas rayonındaǵı áskeriy bólimde ótkerilip, notarius hám yurist xızmetkerler tárepinen áskeriy xızmettegilerge biypul huqıqıy másláhátler berildi.
Akciya dawamında áskeriy xızmettegilerge turaq jay, kvartira, xızmet turaq jayı, qánigelestirilgen turaq jaylar ijara shártnaması (qosımsha ijara), nızamshılıq hújjetlerinde názerde tutılǵan basqa da máseleler boyınsha túsinikler berildi. Sonıń menen birge múlk aldı-sattısı, miyras huqıqı, shańaraqlıq qatnasıqlar hám neke shártnamasın rásmiylestiriw, isenim xatı hám arzanı rásmiylestiriw, sawǵa, ijara, hújjet awdarmasın tastıyıqlaw hám migraciya hám notarial tarawǵa baylanıslı bolmaǵan hár qıylı máselelerde múrájatlar kelip tústi hám olarǵa túsinikler berildi.
Áskeriy xızmettegiler ózlerin qızıqtırǵan sorawlarǵa juwap aldı.
Ilaj juwmaǵında jámi 17 puqaraǵa huqıqıy másláhátler berildi. Sonnan jetewi miyras máselesinde hám onı basqa notarial háreketler boyınsha boldı.
Maǵlıwmat ushın, “Yuksalish” háreketi hám Notarial palata arasındaǵı birge islesiw 2020-jıl sentyabr ayında eki shólkem arasında qol qoyılǵan Memorandum sheńberinde jolǵa qoyılǵan. Usı waqıtqa shekem puqaralardıń huqıqıy sanası hám huqıqıy mádeniyatın arttırıw, notariat tarawın reformalaw procesine puqaralıq jámiyeti institutlarınıń wákilleri, ekspert hám ilimpazlardı jedel tartıw, sonıń ishinde, qayırqomlıq ilajları hám orınlarda úgit-násiyatlaw jumısların ótkeriw menen birge islesiwdi rawajlandırıw boyınsha kelisimlerge erisildi.
Akciya 2020-jıldan baslap 6 jıl dawamında ámelge asırılıp, qamtıp alıw 2020-jılı 607, 2021-jılı 1166, 2022-jılı 2235, 2023-jılı 4140, 2024-jılı 4320 puqaraǵa kóbeygen. Bıyıl da 5000 ǵa shamalas puqaraǵa biypul másláhátler beriw rejelestirilgen.

Qaraqalpaqstan xabar agentligi