Jámiyettiń rawajlanıwında hayal-qızlardıń ornı ayrıqsha. Ásirese, olardıń ekonomikalıq erkinligi, jeke potencialın júzege shıǵarıwı ushın jaratılıp atırǵan sharayatlar olardıń ómirge bolǵan kózqarasların ózgertip, keleshekke degen isenimin bekkemlemekte. Bul baǵdarda sistemalı jumıslar ámelge asırılmaqta.

Tórtkúl rayonında ótkerilgen májiliste áne, usı máseleler dodalandı. Qaraqalpaqstan Respublikası Ministrler Keńesi Baslıǵınıń orınbasarı – Shańaraq hám hayal-qızlar komitetiniń baslıǵı M.Axmedovanıń qatnasıwında shólkemlestirilgen ushırasıwda hayal-qızlardı isbilermenlik hám ónermentshilikke keńnen tartıw, olardıń belsendiligin arttırıw boyınsha hár tárepleme pikir alısıldı.
Rayon hákimligi Málimleme xızmeti bóliminiń maǵlıwmatına bola, ilajda qatnasqan hayal-qızlarǵa bar imkaniyatlar, óz biznesin jolǵa qoyıw, ónimlerin bazarǵa alıp shıǵıw jolları haqqında keń túsinikler berildi. Olardıń jeke baslamaların qollap-quwatlaw, ámeliyattaǵı qıyınshılıqlardı saplastırıw mexanizmleri de dodalandı. Bul bolsa qatnasıwshılarda jáne de úlken qızıǵıwshılıq oyattı.
Bunday ushırasıwlar hayal-qızlardıń turmıstaǵı belsendiligin kúsheytiw, jámiyette óz ornın tabıwına xızmet etpekte.

Qaraqalpaqstan xabar agentligi