Jas áwladtıń mazmunlı dem alıwı, qábilet hám potencialın kórsetiwi, sonday-aq, olarda milliy qádiriyatlarǵa húrmet, kásip-ónerge qızıǵıwshılıq sezimin qáliplestiriw maqsetinde orınlarda túrli mádeniy-aǵartıwshılıq ilajlar ótkerilmekte. Sonıń ishinde, Tórtkúl rayonında da “Áhmiyetli 90 kúnlik” baǵdarlaması sheńberinde gezektegi tárbiyalıq ilaj shólkemlestirildi.

Rayonlıq mektepke shekemgi hám mektep bilimlendiriwi bólimine qaraslı “Bárkamal áwlad” balalar mektebinde “Dem alıs aqshamı” bayram ilajı bolıp ótti. Bul ilajda rayon hákimligi, diniy uyımlar hám ruwxıylıq orayınıń wákilleri qatnastı. Atap aytqanda, Tórtkúl rayonı hákimliginiń ruwxıy-aǵartıwshılıq isleri boyınsha qánigesi N.CHerikaeva, rayon imam-xatibi D.Kilichev, Din isleri boyınsha komitettiń rayon boyınsha bas qánigesi Q.Omonbaev hám Respublikalıq Ruwxıy-aǵartıwshılıq orayı rayonlıq bóliminiń xızmetkerleri qatnastı.
Onda shıǵıp sóylegen juwapkerler jaslardı milliy ónermentshilik hám kásip-ónerge qızıqtırıw, olardıń bántligin támiyinlew, ruwxıy tárbiyanı kúsheytiw baǵdarında alıp barılıp atırǵan jumıslar haqqında pikir bildirdi. Sonday-aq, ayırım belsendiler Respublikalıq Ruwxıylıq hám aǵartıwshılıq orayınıń rayonlıq bólimi tárepinen xoshametlendi.
Ilaj dawamında mektep oqıwshıları hár qıylı milletlerdiń ayaq oyınların atqardı. Talantlı jaslar tárepinen tayarlanǵan koncert baǵdarlaması qatnasıwshılarǵa kóterińki keypiyat baǵıshladı.

Qaraqalpaqstan xabar agentligi