Búgingi kúnde isbilermenlikti rawajlandırıw, taraw wákillerin qollap-quwatlaw, olardıń mashqalaların tıńlaw hám sheshiw jámiyetti rawajlandırıwdıń tiykarǵı áhmiyetli baǵdarlarınan biri bolıp esaplanadı. Usı maqsette Ámiwdárya rayonında isbilermenler menen ashıqtan-ashıq sóylesiw shólkemlestirildi.

Ótkerilgen bul ushırasıwda rayon hákimi S.Xwjametov, Ózbekstan Respublikası Prezidenti janındaǵı Isbilermenlik subektleriniń huqıqları menen nızamlı máplerin qorǵaw boyınsha wákil apparatı Qaraqalpaqstan Respublikası bóliminiń bas inspektorı E.Dosanov, Sawda-sanaat palatası Qaraqalpaqstan Respublikası basqarmasınıń baslıǵı K.Artikov, rayon prokurorı B.Masharipov, rayon hákiminiń orınbasarları, hákim járdemshileri, tiyisli shólkemlerdiń basshıları, kommerciyalıq banklerdiń wákilleri hám belsendi isbilermenler qatnastı,- dep maǵlıwmat beredi rayon hákimligi Málimleme xızmeti bólimi.
Sóylesiw erkin ruwxta, ashıq hám qızǵın túrde ótti. Isbilermenler ózlerin qızıqtırǵan sorawlar, jumıslarında ushırasıp atırǵan tosqınlıqlar hám mashqalalar boyınsha tikkeley juwapkerlerge múrájat etiw imkaniyatına iye boldı.
Bunday ushırasıwlar isbilermenlik ortalıǵın jaqsılaw, jumıs alıp barıwda júzege kelip atırǵan tosqınlıqlardı saplastırıw hám aymaqtaǵı ekonomikalıq ósiwge úles qosıwda ayrıqsha áhmiyetke iye.

Qaraqalpaqstan xabar agentligi