Oliy Majlis Nızamshılıq palatası Ekologiya hám qorshaǵan ortalıqtı qorǵaw máseleleri komiteti baslıǵınıń orınbasarı B.Aldamuratov Nókis rayonındaǵı Tóktaw mákan puqaralar jıyındaǵı máhálle jetiligi menen ushırastı.

Onda aymaqtı sociallıq-ekonomikalıq rawajlandırıw hám bántlikti támiyinlew baǵdarında mámleketlik dárejede qaratılǵan itibar, mámleketlik baǵdarlamalardıń mazmun-mánisi, elimizde isbilermenler ushın jaratılıp atırǵan jeńillikler haqqında maǵlıwmatlar berildi.
Sonday-aq, aymaqtaǵı isbilermenlik subektleriniń wákilleri, puqaralar menen sáwbetlesiwler ótkerilip, olardıń múrájatları, pikir-usınısları da tıńlandı.
Xalıq wákiliniń rayondaǵı ushırasıwı 1- sanlı ulıwma bilim beriw mektebinde dawam etti.
Ushırasıwda deputat B.Aldamuratov keyingi jılları mámleketimizde bilimlendiriw tarawına qaratılıp atırǵan itibar, nızamshılıqtaǵı sońǵı jańalıqlar, jańadan qabıl etilip atırǵan nızamlardıń mazmun-mánisi hám áhmiyeti boyınsha sóz etti. Sonday-aq, usı bilim dárgayında oqıwshılar ushın jaratılǵan sharayatlar menen jaqınnan tanısıp, jaslarımızdıń sapalı bilim alıwı, olardıń jetik maman kadrlar bolıp jetilisip shıǵıwında pedagog ustazlardıń da ayrıqsha miyneti bar ekenligin atap ótti.
Maǵlıwmat ushın atap ótetuǵın bolsaq, búgingi kúnde bul bilim dárgayında 986 oqıwshı bilim almaqta. Quwanıshlı tárepi mektep jámááti, oqıwshılar da sport jarıslarında ásirese “Kewilli start” (Vesyolıy start) sport oyınında bir neshe márte Ózbekstan chempionı bolǵanlıǵı maqtawǵa ılayıq.
Deputattıń keyingi mánzili rayon aymaǵındaǵı 2018-jıldan berli “Quyashta qaqlanǵan ekologiyalıq taza organikalıq pomidor islep shıǵarıw hám eksporttı keńeytiw” joybarın ámelge asırıp atırǵan “Biogumus” fermer xojalıǵı boldı.
Búgingi kúnde fermer xojalıǵında 60 gektar maydanda Italiyanıń «San-Marsano» pomidor sortı jetistirilmekte. Jılına 1,2 mıń tonna jalpı ónim alınadı hám 110 tonna qayta islengen (qaqlanǵan) organikalıq pomidor ónimi islep shıǵarıladı. Bul pomidor sortı qaqlaw ushın mólsherlengen bolıp, Italiyadan import etiledi hám organikalıq tóginler menen bayıtılǵan jerlerde jetistiriledi. Bunnan tısqarı, bul sort Aralboyınıń qurǵaq hám ıssı klimat sharayatında jetistiriw ushın qolaylı bolıp esaplanadı. Fermer xojalıǵı tárepinen qayta islengen pomidor ónimleri Ecocert organic standart hám ISO 22000:2018 xalıqaralıq sapa sertifikatlarına iye. Házirgi waqıtta keptirilgen organikalıq pomidor ónimleri Italiya hám Franciya mámleketlerine hár bir kilogramı 5,5-6,2 dollardan eksport etilmekte.
Sáwbetlesiw dawamında deputat fermer xojalıqtıń jumısları menen jaqınnan tanısıp, isbilermenniń aldaǵı reje hám maqsetlerin, pikir-usınısların tıńladı.
Deputattıń ushrasıwları orınlarda dawam etmekpe.

Qaraqalpaqstan xabar agentligi