Qaraqalpaqstan Respublikası Awıl xojalıǵı ministrliginiń jumısshı toparı jaqında Qońırat rayonına barıp, aymaqta ámelge asırılıp atırǵan sanaat hám agrar joybarlar menen tanıstı. Sapar dawamında “QONYRAT GOLDEN EGG”  JShJ qusshılıq xojalıǵında boldı.

2023-jılı shólkemlestirilgen “QONYRAT GOLDEN EGG” JShJ búgingi kúnde zamanagóy qusshılıq xojalıǵı sıpatında xızmet kórsetpekte. Kárxana basshısı Uluǵbek Asanovtıń bildiriwinshe, xojalıq máyek jetistiriwge qánigelesken bolıp, onda Germaniyada jetistirilgen “Lohman Sandy” násilli tawıqlar baǵılmaqta. Bul quslar Qanlıkól rayonındaǵı “Agro Biziness Qanlıkól” JShJ arqalı alıp kelingen. Joybardıń ulıwma bahası 2 milliard sumdı quraydı.

Házirgi waqıtta xojalıqta 32 mıń bas tawıq baǵılmaqta. Jaqın arada bul kórsetkish 40 mıń basqa jetkeriliwi rejelestirilgen. Qus xojalıǵı kompleksi 4,5 gektar maydanda jaylasqan bolıp, jılına 7,5 million dana máyek shıǵarıw quwatlılıǵına iye. Kárxanada házirgi waqıtta 10 jergilikli puqara turaqlı jumıs penen támiyinlengen.

Jumısshı topar kárxanadaǵı mashqalalardı tıńlap, sheshimleri boyınsha usınıslar berildi.

Qaraqalpaqstan xabar agentligi.