Búgin Tashkentte “STADA Health Report 2025” xalıqaralıq sorawnaması nátiyjelerine baǵıshlanǵan prezentaciya bolıp ótti.

Onda jergilikli qánigeler hám ekspertler qatarında Qazaqstan mámleketinen usı taraw wákilleri onlayn qatnastı.
Ilajda shıǵıp sóylegen ekspertlerdiń atap ótiwinshe “STADA Health Report 2025” sorawınıń áhmiyeti sonda, ol xalıqtıń densawlıqtı saqlaw sistemasına bolǵan isenimi, salamat turmıs tárizine múnásibeti hám profilaktikaǵa itibar dárejesin anıqlap, mámlekettegi medicinalıq xızmetlerdiń nátiyjeliligi boyınsha qalıs kózqaras payda etiw imkaniyatın beredi. Bul maǵlıwmatlar mámleketlik siyasatta densawlıqtı saqlawdı jáne de jetilistiriw, xalıqtıń talaplarına sáykes profilaktikalıq baǵdarlamalar islep shıǵıw hám medicinalıq xızmetlerden qanaatlanıw dárejesin arttırıwǵa xızmet etedi. Sonlıqtan, bunday xalıqaralıq izertlewler jámiyette salamatlıq mádeniyatın qáliplestiriw hám tarawdıń rawajlanıwın belgilewde úlken áhmiyetke iye.
“STADA Health Report 2025” izertlewi hár qıylı mámleketlerde jasaytuǵın adamlardıń densawlıqqa bolǵan múnásibeti, farmacevtika hám medicinalıq sawatlılıq dárejesi jáne densawlıqtı saqlaw tarawındaǵı zamanagóy tendenciyalardı tereńirek túsiniwge járdem beretuǵın keń kólemli pikirlerdi óz ishine alǵanın atap ótiw kerek. Sol sebepli, ol óz tarawındaǵı eń iri xalıqaralıq izertlew esaplanadı.
Bul sorawdıń nátiyjelerine bola, ózbekstanlı respondentlerdiń 67 procenti mámlekettegi densawlıqtı saqlaw sistemasınan qanaatlanıwshılıq bildirgen. Bul kórsetkish 22 mámleket qatnasqan izertlewde eń joqarı nátiyjelerden biri sıpatında atap ótildi.
“STADA” kompaniyasınıń Ózbekstandaǵı bas direktorı hám “Ózbekstan hám Qırǵızstan” klasterleriniń basshısı Baxtiyor Hojimuhamedovtıń atap ótkenindey, bıyılǵı izertlew Batıs, Shıǵıs Evropa hám Oraylıq Aziyadaǵı mámleketlerde ótkerilgen. Respondentlerge fizikalıq hám ruwxıy salamatlıq, profilaktika, mámleketlik densawlıqtı saqlaw sistemasınan qanaatlanıw dárejesi, shıpakerler hám farmacevtlerge bolǵan isenim sıyaqlı máselelerge baylanıslı 30 dan aslam sorawlar berilgen.
– Ózbekstan xalqı bul sorawda úshinshi márte qatnaspaqta. Bıyılǵı jıldıń nátiyjeleri ótken jılǵı kórsetkishlerden bir qansha áhmiyetli ózgesheliklerdi kórsetpekte hám buǵan itibar qaratıw kerek. Izertlewge bola, Ózbekstanda densawlıqtı saqlaw sistemasınan qanaatlanıw dárejesi 60 procentten artqan. Bul bolsa qatnasıwshı mámleketler arasında eń joqarı kórsetkishlerden biri bolıp esaplanadı. Bul puqaralardıń densawlıqtı saqlaw sistemasına isenimi saqlanıp atırǵanı hám tarmaqtaǵı reformalar nátiyje berip atır, degen juwmaq beredi. Ayırım mashqalalar bar ekenine qaramastan, mámlekette medicinalıq járdem sapasına bolǵan isenim turaqlı bolıp qalmaqta. Biz STADA global jámáátiniń bir bólegi sıpatında xalıqtıń salamatlıǵın qollap-quwatlawdı ózimizge tiykarǵı wazıypa, dep bilemiz. Izertlew tiykarındaǵı maǵlıwmatlar arqalı biz jumıs alıp barıp atırǵan mámleketlerde adamlardıń salamat turmıs keshiriwine ne tosqınlıq etip atırǵanın tolıq túsiniwge hám bul tosqınlıqlardı saplastırıwǵa umtılamız,-dedi B.Hojimuhamedov.
Izertlew nátiyjeleri “STADA” farmacevtika kompaniyası tárepinen hár jılı shólkemlestiriletuǵın “STADA Health Report 2025” sheńberinde tayarlandı. Oǵan bola, respondentlerdiń 66 procenti salamat turmıs tárizine ámel etiwge umtıladı hám tap sonday adamnıń densawlıǵına ǵamxorlıq etetuǵının bildirgen. Sonday-aq, 91 procent respondent salamat awqatlanıwdı keselliklerdiń aldın alıwda áhmiyetli faktor, dep esaplaydı. Sonıń menen birge, profilaktikalıq tekseriwlerde qatnas dárejesi tómen bolıp qalmaqta. Tek ǵana 31 procent respondent turaqlı tekseriwden ótip atırǵanın bildirgen bolsa, 39 procenti ulıwma barmaytuǵının aytqan. Oǵan tiykarǵı sebepler sıpatında waqıttıń jetispewshiligi, materiallıq imkaniyattıń sheklengenligi hám emlewxanada infekciya juǵıwdan qorqıw sıyaqlı faktorlar atap ótilgen.
Juwmaqlap aytqanda, “STADA Health Report 2025” nátiyjeleri densawlıqtı saqlaw máseleleri puqaralardıń turmısında áhmiyetli orın iyelep atırǵanın kórsetti. Sonıń menen birge, medicinalıq xızmetlerdiń sapasın jaqsılaw, isenimdi jáne de bekkemlew hám profilaktikalıq xızmetlerge keńirek itibar beriw máseleleri áhmiyetliliginshe qalmaqta.
Prezentaciya juwmaǵında ekspertler qatnasıwshılardıń sorawlarına hár tárepleme juwap berdi.

Nasiba Ziyodullaeva, ÓzA