Ózbekstan Respublikası Prezidenti Shavkat Mirziyoev Mongoliya Prezidenti Uxnagiyn Xurelsuxtiń mirát etiwine bola 24-25-iyun kúnleri mámleketlik sapar menen usı mámlekette boldı.

Tariyxtaǵı birinshi bolǵan bul sapar etiw Ózbekstan-Mongoliya qatnasıqlarında jańa basqıshtı baslap berdi hám kóp táreplemeli birge islesiw rawajlanıwı ushın keń imkaniyatlar ashtı.
Mámleketimiz basshısı keshe Ulan-Bator qalasında Prezident Uxnaagiyn Xurelsux penen tar sheńberde hám keńeytilgen quramda sóylesiw ótkerdi. Ámeliy birge islesiwdiń perspektivalı baǵdarları, bárinen burın, sawda-ekonomikalıq hám sanaat tarawlarında kooperaciyanı rawajlandırıw máseleleri kórip shıǵıldı.
Joqarı dárejedegi sóylesiwler juwmaǵında Ózbekstan Respublikası Prezidenti Shavkat Mirziyoev hám Mongoliya Prezidenti Uxnaagiyn Xurelsux Keń kólemli sheriklik qatnasıqların ornatıw haqqındaǵı birgeliktegi deklaraciyaǵa qol qoyıldı.
Sonday-aq, Prezidentlerdiń qatnasıwında tómendegi hújjetlerge qol qoyıldı:
-ósimlikler karantini hám qorǵalıwı, joqarı bilimlendiriw, taw-kán sanaatı, qorshaǵan ortalıqtı qorǵaw, jınayatshılıqtıń aldın alıw hám oǵan qarsı gúresiw, densawlıqtı saqlaw hám medicina ilimi, denetárbiya hám sport tarawlarında birge islesiw haqqındaǵı kelisimler;
-eki mámleket arxiv uyımları arasındaǵı birge islesiw haqqında bayanat;
-Ózbekstan Respublikası Investiciyalar, sanaat hám sawda ministrligi menen Mongoliya Ekonomika hám rawajlanıw ministrligi arasında, sırtqı isler ministrlikleri arasında 2026-2027-jıllarǵa mólsherlengen, Ózbekstan Respublikası Mádeniyat ministrligi menen Mongoliya Mádeniyat, sport, turizm hám jaslar ministrligi arasında 2025-2028-jıllarǵa mólsherlengen birge islesiw baǵdarlamaları;
– Ózbekstan Respublikası Awıl xojalıǵı ministrligi hám Mongoliya Azıq-awqat, awıl xojalıǵı hám jeńil sanaat ministrligi arasında awıl xojalıǵı tarawındaǵı birge islesiwdi keńeytiw boyınsha birge islesiw rejesi;
– Ózbekstan Respublikası Ekologiya, qorshaǵan-ortalıqtı qorǵaw hám klimat ózgeriwi ministrligi menen Mongoliya Mádeniyat, sport, turizm hám jaslar ministrligi arasında ekoturizm tarawındaǵı háreketler rejesi.
Bul áhmiyetli hújjetler óz-ara qatnasıqladıń jańa basqıshında eki el ushın perspektivalı hám úlken áhmiyetke iye óz-ara paydalı qatnasıqlar baslanǵanın tastıyıqlaydı.
Eki mámleket arasındaǵı birge islesiw strategiyalıq máplerge tereń húrmet hám tariyxıy-mádeniy jańalıqqa tiykarlanǵanın atap ótiw zárúr. Ulıwma, keń kólemli sheriklik máńgi doslıq qatnasıǵın bekkemlep, birge islesiw tariyxında jańa bet ashatuǵını sózsiz.
Prezidentler ómirlik joldasları menen eki mámleket kórkem óner sheberleriniń birgeliktegi koncertinde qatnastı.
Sapardıń ekinshi kúni Ózbekstan Respublikası Prezidenti Shavkat Mirziyoev hám Mongoliya Prezidenti Uxnaagiyn Xurelsux ómirlik joldasları menen “Ix Tenger” kompleksine bardı. Prezidentler hám birinshi xanımlar birgelikte terek ekti.
Máresim eki mámleket xalıqları arasındaǵı doslıq barǵan sayın bekkemlenip atırǵanı, Ózbekstan – Mongoliya keń kólemli sheriklik qatnasıqlarınıń rawajlanıwında jańa basqısh baslanǵanınıń simvolı boldı.
Sapar dawamında joqarı mártebeli miymanlar «Naadam» dástúriy mongol bellesiwlerin tamasha etti.
Mongoliyaǵa birinshi sapar eki mámleket arasındaǵı doslıq hám kóp táreplemeli birge islesiw qatnasıqlarınıń rawajlanıwında tariyxıy waqıya boldı.
Sonıń menen Ózbestan Respublikası Prezidenti Shavkat Mirziyoevtiń Mongoliyaǵa mámleketlik saparı juwmaqlandı.

ÓzA