Nókis Olimpiya hám paralimpiya sport túrlerine tayarlaw orayında Ózbekstan Respublikası Qurallı Kúshleri áskeriy xızmetkerleri arasında milliy gúres boyınsha “Prokuror kubogi” respublikalıq turniri bolıp ótti.

Ótkerilgen jarısqa 4 komanda qatnasıp, erler 4, hayal-qızlar 1 salmaq kategoriyaları boyınsha óz-ara bellesti.
Keskin bellesiwlerge bay bolǵan jarıs juwmaǵında, 73 kg salmaq kategoriyasında Arqa Batıs áskeriy garnizonı xızmetkeri Foziliddin Majidov, 81, 90 hám +90 kg da Milliy gvardiya xızmetkerleri Begzad Dosqulov, Ayubxan Mansurov hám Shoberdi Rustamovlar birinshi orındı iyelewge miyasar boldı.
Al, hayal-qızlar arasında 63 kg salmaqta ótkerilgen jarısta Arqa Batıs áskeriy garnizonı xızmetkeri Gúlayım Jumabaeva altın medal iyesine aylandı.
Respublikalıq turnir juwmaǵında, jarıs jeńimpazları shólkemlestiriwshiler tárepinen arnawlı diplom, medal hám estelik sawǵalar menen sıylıqlanadı.
-Bul jarısta eń awır salmaqta bellesip, qola medalın iyelewge miyasar boldım,-deydi Qaraqalpaqstan Respublikası Ayrıqsha jaǵdaylar basqarması xızmetkeri Srajatdin Jaqabaev.-Bellesiwler oǵada qıyın bolıp, maǵan biraz áwmet jetpedi. Aldaǵı waqıtları óz ústimde shınıǵıwlardı dawam etip, jeńimpazlıqtı qolǵa kirgiziwge háreket etemen.

Adilbay Orazov,
Qaraqalpaqstan xabar agentligi sholıwshısı