Mámleketimizge investiciya alıp keliw, óndiris kólemin arttırıw arqalı dúnya bazarına shıǵıw boyınsha alıp barılıp atırǵan keń kólemli jumıslar búgin respublikamızda jaqsı nátiyjeler menen kózge taslanbaqta.

«Qurılıs qurǵan el jańa» degenindey, qurılıs isleri rawajlanǵan elde, jańalanıwlar kózge taslanadı. Qurılıs ónimleri ózimizde islep shıǵarılsa, bul islep shıǵarıwshı isbilermenge de, xalıqqa da qolaylıqlardı jaratadı.
Taqıyatas rayonındaǵı “Altinko’l imarat universal qurilis”juwapkershiligi sheklengen jámiyeti tárepinen ulıwma bahası 7,0 mlrd (sonnan bank krediti 4,4 mlrd) sum bolǵan beton zavodın shólkemlestiriw joybarı iske túsiriliw nátiyjesinde 20 jańa jumıs ornı jaratıldı. Kirgizilgen sırt el investiciyası tiykarında zavodtıń qurılıs jumısları usı jıldıń mart ayında juwmaqlanıp, may ayında tolıq iske tústi. Házirgi waqıtta zavodta temir-beton ónimleri islep shıǵarılıp, buyırtpa tiykarında qurılıs mákemelerine jetkerilip berilmekte.
-Kárxanamızda tiykarınan qurılıs tarawına kerekli temir-beton ónimleri islep shıǵarıladı. 6 beton quyıwshı, svarщik, traktorshı barlıǵı bolıp, 20 ǵa shamalas adam jumıs penen támiyinlengen. Buyırtpa kóp bolǵanlıqtan jumıstı úzliksiz alıp barıwǵa háreket etip atırmız. Aldaǵı waqıtta jáne de jumıs ornın keńeytiw rejemiz de bar. Maqsetimiz qarıydarlardıń kewlindegidey, qurılısqa jaramlı beton, temir ónimlerin islep shıǵarıw,-deydi zavod birigadiri Saparbay Redjepov.
Jazdıń jáziyrama ıssısında hawa- rayınıń ıssılıǵın da pisent etpesten qızǵın jumıs alıp barıp atırǵan zavod jumısshıları ónimdi sapalı etip óz waqtında qarıydarǵa jetkerip beriw háreketinde miynet etpekte. Óndiris, qurılıs –elimiz ekonomikasınıń iri tarawlarınıń biri. Respublikamızdıń óndiris keń rawajlanǵan rayonlarınıń biri bolǵan Taqıyatastaǵı bul zavodta isbilermenlerdiń elimizde jaratılıp atırǵan keń imkaniyatlardan paydalanıp atırǵanlıǵınıń haqıyqıy kórinisin kóriwimizge boladı.

G.Turdıshova, Qaraqalpaqstan xabar agentligi.
M.Habibullaevtıń túsirgen súwretleri.