Qaraqalpaqstan awıl xojalıǵı hám agrotexnologiyalar institutında Qaraqalpaqstan Respublikası Ósimlikler karantini hám qorǵaw agentligi hám Germaniyanıń xalıqaralıq birge islesiw jámiyeti (GIZ) menen birgelikte “Ekosertifikatqa iye bolıw dúnya bazarına jol ashadı” atamasında seminar-trening shólkemlestirildi.

Onda organikalıq awıl xojalıǵı ónimlerin islep shıǵarıwshı klasterler, fermer xojalıqları hám qıytaq jer iyeleri, institut professor-oqıtıwshıları, sonday-aq, juwapker qánigeler qatnastı.
Ilajdıń tiykarǵı maqseti – ekosertifikatqa iye bolıwdıń áhmiyetliligi hám organikalıq ónimlerdi jetistiriw procesindegi ámeliyatlardı durıs jolǵa qoyıw boyınsha bilim hám tájiriybe almasıwdan ibarat.
Seminar dawamında ekologiyalıq taza ónimlerdi islep shıǵarıwdıń artıqmashılıqları, organikalıq sertifikatlastırıw sistemaları hám dúnya bazarına shıǵıw ushın zárúr bolǵan sertifikatlastırıw procesleri haqqında keń túrde maǵlıwmatlar berildi.
Ilajda aytıp ótilgenindey, dúnya bazarında organikalıq awıl xojalıǵı ónimlerine bolǵan talaptıń barǵan sayın artıp barıwı, fermerler hám isbilermenler ushın jańa imkaniyatlar jaratpaqta. Ekosertifikat – ónimlerdiń ekologiyalıq tazalıǵı hám sapasın tastıyıqlawshı hújjet bolıp, ol tek ǵana jergilikli emes, al xalıqaralıq bazarlar ushın da úlken áhmiyetke iye.
Germaniyanıń xalıqaralıq birge islesiw jámiyeti (GIZ) wákilleri tárepinen usınılǵan maǵlıwmatlarǵa qaraǵanda, ekologiyalıq awıl xojalıǵı sertifikaciyası dúnya bazarında ónimlerdiń básekige shıdamlılıǵın arttırıwǵa járdem beredi. Sonıń nátiyjesinde, fermerler tek ǵana ishki bazarda emes, al Evropa, Aziya hám basqa regionlarda da óz ónimlerin tabıslı satıw imkaniyatına iye boladı.
Seminarda dúnya bazarına shıǵıw ushın organikalıq ónimlerdiń sapasın arttırıw, ónimlerdiń ekologiyalıq tazalıǵın tastıyıqlaw múmkinshiligi, sertifikatlastırıwda mashqalalar hám olardı sheshiw jolları, ónimlerdiń dúnya bazarına shıǵıwı ushın talap etiletuǵın joqarı sapa standartları, organikalıq awıl xojalıǵı ónimleriniń eksportı, organikalıq ónimlerdi eksport etiwdiń artıqmashılıqları hám dúnya bazarlarındaǵı talaplar boyınsha keń túrde túsinikler berildi.
Seminar dawamında qatnasıwshılarǵa sertifikat alıw ushın zárúr bolǵan ámeliy usınıslar hám qádemler kórsetildi. Óz gezeginde, GIZ hám Qaraqalpaqstan Respublikası Ósimlikler karantini hám qorǵaw agentligi usınday seminar-treninglerdi aldaǵı waqıtları da dawam ettiriwdi rejelestirmekte. Bul arqalı organikalıq awıl xojalıǵı ónimlerin jetistiriw hám eksport etiwdi jáne de rawajlandırıw, sonday-aq, jergilikli fermerler ushın jańa bazarlardı ashıw maqset etilgen.
Ilajda qatnasıwshılar sertifikatlastırıw procesindegi áhmiyetli máseleler boyınsha ózlerin qızıqtırǵan sorawlarǵa juwap alıp, óz tájiriybeleri menen de ortaqlastı.

Á.Jiyemuratov,
Qaraqalpaqstan xabar agentligi