Taxtakópir rayonı boyınsha paydalanıwda jámi 364 kilometrlik gaz tarmaqları bar. Sonıń 20,1 kilometrlik bólegi jer astında, al 343,8 kilometrlik bólegi jer ústinde jaylasqan.

Mine, usı gaz tarmaqları arqalı rayon xalqına tábiyǵıy gaz jetkerip berilmekte. 2025-2026-jılǵı gúzgi-qısqı máwsimge rayon aymaǵındaǵı tutınıwshılardıń gaz támiynatın ele de jaqsılaw maqsetinde «Hududgaz Qaraqalpaqstan» gaz támiynatı filialı tárepinen tastıyıqlanǵan reje grafik tiykarında bir qatar jumıslardı ámelge asırıw belgilep alınǵan.
Atap aytqanda, 4,1 kilometrlik gaz tarmaqların rekonstrukciyalaw, 82 gaz bólistiriwshi punktlerdi reviziyadan ótkeriw, birewinde kapital ońlaw jumısların alıp barıw, 30 kilometrlik gaz tarmaqların hawa basımı astında sınaw, 20,1 kilometrlik jer astı gaz tarmaqların arnawlı priborlar járdeminde jaǵdayların tekseriw, 25 kilometrlik gaz tarmaqların tártiplestiriw hám boyaw jumısların alıp barıw rejelestirilgen.
«Hududgaz Qaraqalpaqstan» gaz támiynatı filialı baspasóz xızmetiniń maǵlıwmatlarına qaraǵanda búgingi kúnge kelip usı rejedegi jumıslardıń 50 procenti ámelge asırılǵan.
Hár bir kúnnen nátiyjeli paydalanıp bul jumıslar tabıslı juwmaqlansa, rayon aymaǵındaǵı 1640 tan aslam xojalıqtıń gaz támiynatı jaqsılanadı.
Taraw xızmetkerleri tárepinen búgingi kúni bul jumıslar qızǵın dawam etpekte.

Qaraqalpaqstan xabar agentligi