Apple kompaniyası 2025-jılǵı WWDC (Worldwide Developers Conference) kórgizbesinde AirPods qulaqshınları ushın sezilerli jańalanıwlardı járiyalawı kútilmekte. Jańa funkciya hám imkaniyatlar qulaqshınlardı jáne de aqıllı hám kóp funkciyalı gadjetke aylandıradı. Apple injenerleri AirPods qulaqshınlarına paydalanıwshınıń uyqı jaǵdayın anıqlaw imkaniyatın beriwshi jasalma intellekt tiykarındaǵı texnologiyanı engizbekte. Usı jańalıq sebepli paydalanıwshı uyqılap qalǵanında qulaqshınlar onı anıqlaydı hám muzıkanı yamasa audiokitaptı avtomat túrde toqtatadı. Bul bolsa tek ǵana qolaylılıq emes, al energiya jumsalıwın da azaytıwǵa xızmet etedi.

Jańa funkciya júrek soǵıw ritmi, háreketsizlik jaǵdayı hám basqa biometrikalıq belgiler arqalı paydalanıwshınıń uyqılap qalǵanın anıqlaydı. Bul imkaniyat Apple ekosistemasındaǵı basqa qurılmalar – máselen, iPhone yamasa Apple Watch penen birgelikte jáne de nátiyjeli isleydi.
Jáne bir itibarlı jańalıq – AirPods arqalı iPhone yamasa iPad kamerasın basqarıw funkciyası. Endi paydalanıwshı AirPods ayaǵına (stem) jeńil tiyiw arqalı aralıqtan turıp súwretke túsiwi múmkin boladı. Bul funkciya, ásirese, selfi alıw, topar menen súwretke túsiw yamasa shtativten paydalanǵanda júdá qolaylı.
Bunday jańalıqlar Apple kompaniyasınıń AirPods qulaqshınların tek ǵana muzıkaǵa mólsherlengen gadjet emes, al paydalanıwshınıń turmısın ápiwayılastıratuǵın aqıllı quralǵa aylandırıw jolında qádem taslap atırǵanın kórsetedi.

Madinabonu NASRIEVA, Anvarxwja AHMEDOV, ÓzAnıń xabarshıları