Amerika Qurama Shtatlarında Prezident Donald Tramptıń siyasatına qarsı mitingler bolıp ótip atırǵanına qaramastan, 79 jastı qarsı alǵan Aq úy basshısı tuwılǵan kúnin áskeriy parad penen belgiledi.

Sonday-aq, Tramp áyne usı waqıtta mámleket armiyası dúzilgeniniń 250 jıllıǵına baǵıshlanǵan ǵalabalıq parad ótkerdi.
Bul 1991-jılı AQSh armiyası birinshi Persiya qoltıǵı urısınan qaytqannan keyingi jeńis paradınan keyingi eń iri usınday máresim boldı. Ilajda jetekshi birinshi xanım Melaniya Tramp penen birge kórinis bergen. Olardıń qasında Ministrler Kabinetiniń bir neshe aǵzası, sonıń ishinde qorǵanıw ministri Pit Xegset te bar edi.
Vashington esteligi janında jıynalǵan Prezident tárepdarları, áskerler hám olardıń shańaraq aǵzaları «tuwılǵan kúnińiz benen, mırza Prezident», – dep jırlaǵan.
Paratda 150 áskeriy texnika quralı hám 6600 ásker qatnasqan, bir neshe tariyxıy urıs dáwirindegi qurallar kórsetilgen.
Máresim qárejeti 45 million dollardı quraǵan. Bul qarjınıń bir bólegi Tramptıń, qalǵanı qayırqomlıq dárekleri esabınan qaplanǵan.
Amerika basshısı armiyanıń jawıngerlik ruwxı hám mártligi haqqında maqtanıshqa tolı bayanat jasadı.

S.Poyonov, ÓzA