Qıytaq jer – xalıq ushın qosımsha dáramat dáregi. Ásirese, erte máwsimde egis jumısları baslanıp, jazdıń dáslepki kúnlerinen-aq palız ónimleri pisip jetilip, bazarda joqarı talapqa iye boladı. Bunı jaqsı ańlaǵan Beruniy rayonındaǵı Biybazar awıl puqaralar jıyınında hár bir shańaraq óz qıytaq jerinde miynet etip, ónimdi birinshi bolıp ishki bazarǵa shıǵarıwǵa umtılmaqta.

18 sotix jer maydanına iye Sh.Babajanova da erte báhárden palız ónimlerin egip, házirgi kúnge kelip olardı ishki bazarǵa birinshi jetkerip beriwshilerden birine aylanǵan. “Miynetke jarasa dáramat,” dep biykarǵa aytpaydı – onıń erte piser kartoshkası shańaraq ushın múnásip dáramat dáregi bolmaqta. Qıytaq jerde jumıs islew sırların jaqsı ózlestirgen Sharifa apa jıl dawamında eki-úsh márte zúráát alıwǵa erispekte, – dep maǵlıwmat beredi rayon hákimligi Málimleme xızmeti bólimi.
Biybazar APJ aymaǵında 7000 nan aslam xalıq jasaydı. Olar tiykarınan diyqanshılıq hám sharwashılıq penen shuǵıllanadı. Bul bolsa qıytaq jerlerden únemli paydalanıw, óz miyneti menen abadan turmıs qurıw imkaniyatın bermekte.

Qaraqalpaqstan xabar agentligi