Sanlı bilimlendiriw – bilimlendiriw procesin sanlı texnologiyalar arqalı nátiyjeli etiwdi gózlegen sistema. Oǵan onlayn kurslar, mobil qosımshalar, virtual klasslar kiredi.

Bul tarawdı rawajlandırıw bolsa búgingi kúnniń talabı. Sebebi búgingi miynet bazarına dizayn, buxgalteriya, SMM, programmalastırıwdı biletuǵın kadrlar kerek.

Sanlı texnologiyalar ministrliginde Qatardıń “MBK Holding” kompaniyasınıń wákilleri menen shólkemlestirilgen ushırasıwda da sanlı bilimlendiriw, startap, jasalma intellekt, sanlı texnologiyalar tarawında qánigelerdi tayarlaw hám mamanlıǵın arttırıw sıyaqlı tarawǵa tiyisli bir qatar baǵdarlarda birge islesiwdi jolǵa qoyıw dodalandı.

Sapar dawamında miymanlar Sanlı texnologiyalar ministrligi, IT Park hám UZINFOCOM – birden-bir sanlı integrator jumısı menen jaqınnan tanıstı.

“MBK Holding” – 1969-jılı Doxada shólkemlestirilgen shańaraqlıq shólkem bolıp, sanlı texnologiyalar, joqarı texnologiyalar hám startaplardı qollap-quwatlawǵa qánigelesken. Kompaniya jas isbilermenler hám innovaciyalıq joybarlardı rawajlandırıwǵa úlken itibar qaratadı.

“MBK Holding” tárepinen Ózbekstannıń sanlı ekosistemasına hám startaplarına investiciya kirgiziw, Qatar sanlı sheshimlerin integraciyalaw, Qatardaǵı kompaniyalar ushın Ózbekstannan IT qánigelerin jallaw sıyaqlı baǵdarlarǵa úlken qızıǵıwshılıq bildirildi.

Ushırasıw juwmaǵında tárepler óz-ara birge islesiw jol kartasın islep shıǵıwǵa kelisip aldı.

Nigora RAHMONOVA,
ÓzAnıń xabarshısı