Búgingi kúnde volontyor atamasın júda kóp esitemiz biraq, bul sózdiń mánisin bilemiz be? Volontyor sóziniń mánisi kewilli jas degen mánini bildiredi. Volontyorlar tiykarınan adamlarǵa biyminnet, biyǵárez jaqsılıq islewshi jaslar tárepinen dúziledi. Jámiyettiń rawajlanıwı tek ǵana ekonomikalıq ósiw hám texnologiyalıq rawajlanıw menen emes, al adamlardıń bir-birine bolǵan mehir-muhabbatı hám biyǵárez járdem kórsetiwi menen de belgilenedi. Mine, usınday iygilikli maqsetler jolında pidayı jaslar tárepinen túrli volontyorlıq háreketleri shólkemlestirilip, jumıs alıp barılmaqta. Olardıń arasında Qaraqalpaqstan Respublikası Jaslar isleri agentligi janında dúzilgen “Universal” volontyorlıq háreketi ayrıqsha itibarǵa ılayıq.

“Universal” volontyorlıq háreketi 2024-jıl mart ayında bir topar pidayı jaslar tárepinen shólkemlestirilgen bolıp, hárekettiń basshısı Yusup Kurbaniyazov. Yusup ózi jas bolıwına qaramastan jaslardı bir maqsetke baǵdarlay aldı, “biz volontyorlar jaqsılıq elshilerimiz,” deydi Yusup Kurbaniyazov. Hárekettiń tiykarǵı maqseti – jámiyetke jaqsılıq islew, járdemge mútáj insanlarǵa, haywanlarǵa hám qorshaǵan ortalıqqa mehir kórsetiwden ibarat. Dáslep 15 jas penen jolǵa qoyılǵan bul háreket búgingi kúnde 200 den aslam volontyorlardı óz qatarına tartqan. Bul háreket tek ǵana Nókis qalasında emes, Xojeli, Shımbay hám Taqıyatas rayonlarında óz bólimlerine iye. Háreket bular menen toqtap qalmay, basqa rayonlarda da óz jumısın baslaw niyetinde.
Shólkem qısqa waqıt ishinde nátiyjeli joybarlardı ámelge asırıw arqalı kóplegen insanlardıń júreginen orın iyeledi. Tómende usı háreket sheńberinde orınlanǵan tiykarǵı joybarlar menen tanısamız.
«Mehir beremiz” joybarı. Bul joybar haywanlarǵa járdem beriw, olardıń ómirin saqlap qalıw hám jámiyette olarǵa unamlı múnásibet qáliplestiriwge qaratılǵan. Volontyorlar tárepinen pıshıq hám iytler ushın arnawlı azıq-awqatlar tarqatılıp, olarǵa ǵamxorlıq kórsetildi. Joybar arqalı jámiyette haywanlarǵa miyrim-shápáát sezimlerin qáliplestiriw maqset etilgen.
“Balalarǵa beriń dúnyanı” joybarı. Nawqas balalar ómirge jáne de úmit penen qarawı, olardıń keypiyatın kóteriw ushın shólkemlestirilgen joybar. Volontyorlar balalarǵa sawǵalar tarqatıp, túrli oyınlar shólkemlestiriw arqalı olardıń júzine kúlki hám quwanısh baǵıshladı.
“Ziyalımız” joybarı. Ilim-aǵartıwshılıqtı keńnen úgit-násiyatlaw maqsetinde alıs aymaqlardaǵı máhállelerde kitapxanalar shólkemlestirilip, jaslarǵa kitaplar jetkerip berildi. Bul baslama arqalı jaslardıń bilim alıw imkaniyatları keńeytilip, kitap oqıw mádeniyatın qáliplestiriwge úles qosıldı.
Jaqsılıq akciyaları. “Universal” volontyorlıq háreketi tárepinen hár qıylı máwsimlik akciyalar da ótkerilip kelinbekte. Sonnan, abadanlastırıw xızmetkerleri hám úysiz adamlarǵa qıs kúnlerinde ıssı awqat hám nan ónimleri tarqatılıp, aymaqlardı tazalaw hám abadanlastırıw jumısları shólkemlestirildi.
Bunday ilajlar arqalı volontyorlar tek ǵana járdemge mútáj insanlarǵa járdem berip qoymastan, al jámiyette jaqsılıq hám saqawat ortalıǵın bekkemlewge xızmet etpekte.
Volontyorlıq háreketi jaslardıń turmısına unamlı tásir kórsetip, olarda sociallıq belsendilik, miyrim-shápáát, jámáátte islesiw kónlikpelerin qáliplestiredi. Volontyor sıpatında jumıs alıp barǵan jaslar:
✔ Jańa doslar arttıradı, jámáátte islew tájiriybesine iye boladı.
✔ Pidayılıq hám saqawatlılıqtı úyrenedi, jámiyetke paydalı bolıw sezimin sezedi.
✔ Basshılıq hám shólkemlestiriwshilik kónlikpelerine iye boladı.
✔ Óziniń ıqtıyarlı miyneti arqalı tájiriybe arttıradı, bul bolsa keleshektegi kásibi ushın úlken áhmiyetke iye boladı.
Juwmaqlap aytqanda, qısqa waqıt ishinde “Universal” volontyorlıq háreketi Qaraqalpaqstan Respublikasındaǵı eń belsendi jámáátlerden birine aylandı. Olar óz qatarlarına iygilikli islerge biypárwa bolmaǵan jaslardı tartıp, jámiyetimizdiń rawajlanıwına óz úlesin qospaqta.
Jaqsılıq islewden hesh qashan toqtamań!

Gulshada Qayratbaeva, QMU, qaraqalpaq filologiyası hám jurnalistika qánigeliginiń 1-kurs studenti

Qaraqalpaqstan xabar agentligi