Keshe Tashkent qalasında futbol boyınsha Ózbekstan Pro-ligasında 9-tur sheńberinde bir oyın bolıp ótti.
Atap aytatuǵın bolsaq, usı tur sheńberinde Nókistiń «Aral» komandası Tashkenttiń «Olimpik» komandası menen óz-ara ushırastı.

Oyın futbol jankúyerleri kútkenindey oǵada keskin hám qızıqlı waqıyalarǵa bay bolıp, ushırasıwdıń 6-minutında «Aral» komandası oyınshısı Izzatulla Abdulahaqov «Olimpik» dárwazasın anıq nıshanǵa aldı hám oyındaǵı esaptı ashıwǵa miyasar boldı.
Bunnan soń eki komanda aǵzaları da esaptı ózgertiw ushın bir qatar hújimler shólkemlestirdi. Biraq, bul hújimlerdiń barlıǵı da nátiyjesiz juwmaqlandı hám oyın «Aral» komandasınıń jeńisi menen tamamlandı.
Ótkerilgen keshegi oyınnan soń Nókistiń «Aral» klubı 16 upay toplap, onlayn turnir kestesinde 2-orınǵa shıǵıp aldı.
Al, respublikamız abırayın qorǵap kiyatırǵan «Jayhun» komandası bolsa, 8-turdan soń 8 upay menen 4-orındı iyelep tur.
16-iyun kúni «Jayhun» klubı 9-turda chempionat autsayderi «FARDU» ǵa qarsı oyın ótkeredi.

Adilbay Orazov,
Qaraqalpaqstan xabar agentligi sholıwshısı