Oliy Majlis Nızamshılıq palatasınıń Spikeri Nuriddin Ismoilov basshılıǵındaǵı delegaciya Qazaqstan Respublikasınıń Astana qalasında bolıp tur. Sapar etiw dawamında Túrkiy tilles mámleketler parlament assambleyasınıń (TurkPA) “TURKTIME: parlament diplomatiyasınıń roli” temasında bolıp ótetuǵın 14-jalpı májilisine qatnasıw hám bir qatar eki tárepleme ushırasıwlar ótkeriw názerde tutılǵan.

Bul haqqında tómengi palatanıń baspasóz xızmeti málim etti.
Sonıń ishinde, sapar sheńberinde Ázerbayjan Respublikası Milliy Mejlisi Baslıǵı Sohiba Gafarova menen ushırasıw ótkerildi. Onda eki mámleket basshılarınıń siyasiy erk-ıqrarı sebepli Ózbekstan hám Ázerbayjan arasındaǵı qatnasıqlar rawajlanıp atırǵanı, birge islesiwdiń barlıq baǵdarlarında unamlı ósiw baqlanıp atırǵanı ayrıqsha atap ótildi.
S.Gafarova Prezident Shavkat Mirziyoevtiń basshılıǵında Ózbekstanda ámelge asırılıp atırǵan tariyxıy reformalardı joqarı bahaladı. Eki mámleket arasındaǵı parlamentleraralıq sóylesiw ádewir jedelleskenin atap ótti. Óz-ara baylanıslar xalıqaralıq parlamentleraralıq shólkemler sheńberinde bekkemlenip atırǵanı hám parlamentleraralıq birge islesiw toparlarınıń dúzilgeni áhmiyetli faktor bolıp atırǵanın atap ótti.
Nuriddin Ismoilov sonday-aq, Qırǵız Respublikası Jogorku Keneshi toraǵası Nurlanbek Turǵunbek ulı menen ushırasıw ótkerdi.
Sóylesiw waqtında ózbek-qırǵız qatnasıqları strategiyalıq sheriklik dárejesinde jedel rawajlanıp atırǵanı, mámleket basshılarınıń turaqlı ushırasıwları hám joqarı dárejedegi sóylesiwleri eki tárepleme parlamentleraralıq qatnasıqlardı keńeytiw ushın bekkem tiykar jaratqanı atap ótildi.
N.Turǵunbek ulı bıyıl aprel ayında Tashkent qalasında bolıp ótken Parlamentleraralıq Awqamnıń 150-yubiley assambleyası joqarı dárejede shólkemlestirilgenin atap ótip, ol parlament diplomatiyasınıń ózine tán úlgisi sıpatında kóringenin atap ótti. Sóylesiw waqtında eki tárepleme parlamentleraralıq baylanıslardı bunnan bılay da bekkemlew haqqında sóz boldı.

M.Komilova, ÓzA