Prezidentimizdiń baslaması menen baslanǵan “Áhmiyetli 90 kún” joybarı elimiz boylap barlıq tarawlarda jańa ruwx, jańasha kózqaraslar hám ámeliy háreketler basqıshına aylandı. Bul baslamanı Ámiwdárya rayonındaǵı 62-sanlı ulıwma bilim beriw mektebiniń jámááti úlken qızıǵıwshılıq penen kútip alıp, dáslepki on kúnlik jumıs dawamında oqıwshılardı qamtıp alǵan mazmunlı ilajlardı ámelge asırdı.

Mektepte ótkerilgen ilajlar tiykarınan jaslardıń fizikalıq hám ruwxıy potencialın arttırıwǵa, olardı zamanagóy bilimler menen qurallandırıwǵa, dóretiwshilik hám intakerlik ruwxın kúsheytiwge qaratıldı. Usı kúnlerde sport jarısları, kompyuter baǵdarlamaların úyreniw, “Mehir hám itibar – balalar ushın eń úlken sawǵa” atamasında dógerek sáwbetleri, hár qıylı joybar prezentaciyaları, kitapxanalarǵa saparlar, teatr saxnalastırıw, sanlı súwret salıw boyınsha tańlawlar sıyaqlı bir qatar ilajlar shólkemlestirildi. Bul ilajlar oqıwshılardıń oy-pikirin bayıttı, olardı bir jámáát bolıp islewge, dóretiwshilik pikirlewge, óz ideyaların erkin bildiriwge baǵdarladı. Ásirese, hár bir baǵdardaǵı jumıslar olar ushın jańa qızıǵıwshılıq hám kónlikpelerdi júzege shıǵardı.
Sonday-aq, “Quwnaq startlar” atamasındaǵı sport jarısı ayrıqsha itibarǵa ılayıq boldı. Denetárbiyası páni muǵallimleri J.Ywldoshev hám Sh.Xasanovalar basshılıǵında ótkerilgen bul jarısta oqıwshılar ózleriniń shaqqanlıǵın, jámááttegi sáykesligin hám sportqa bolǵan mehirlerin kórsetti. Jarıs juwmaǵında eń belsendi hám shaqqan qatnasıwshılar anıqlanıp, olar estelik sawǵaları menen sıylıqlandı. Bunnan tısqarı, mektepte ótkerilgen súwretler hám shıǵarmalar tańlawları da oqıwshılardıń dóretiwshilik potencialın kórsetiwge xızmet etti. Súwret salıw tańlawında Hayotbek Maxsaboev, óziniń dástúriy emes qatnası hám súwretlep pikirlewi menen birinshi orındı qolǵa kirgizdi. Shıǵarmalar tańlawında bolsa Sarvinoz Nurmanova óziniń kórkem hám tásirsheń pikirleri menen eń jaqsı qatnasıwshı dep tabıldı. Olardıń jeńisleri jas dóretiwshiler ushın haqıyqıy ilham dáregi boldı. Bul bolsa oqıwshılarda úlken quwanısh hám jáne de belsene qatnasıw tilegin oyattı. 62-mektep jámááti “Áhmiyetli 90 kún”di tek ǵana minnetleme emes, al ruwx hám qızıǵıwshılıq penen, óz oqıwshılarınıń hár tárepleme rawajlanıwı ushın imkaniyat sıpatında kútip aldı. Bul process dawamında jáne kóplegen iygilikli jumıslar ámelge asırılatuǵını, mektep turmısı jańa basqıshqa kóteriletuǵınına isenemiz.

Shoira Xaytbaeva,
QMU, jurnalistika qánigeligi 1-kurs studenti.
Qaraqalpaqstan xabar agentligi