CHernogoriyanıń Budva qalasında Mámleketlik qarjını basqarıw boyınsha xalıqaralıq birge islesiw bilimlendiriw baǵdarlaması (PEMPAL) sheńberinde “Audit ámeliyatı” hám “Muwapıqlastırıw boyınsha oraylıq bólimler ushın shaqırıqlar” temasında májilis bolıp ótti. Bul ilaj Jáhán banki járdeminde shólkemlestirildi.

Májilisten gózlengen tiykarǵı maqset – mámleketlik finanslıq qadaǵalaw hám ishki audit tarawında sırt ellerde, sonıń ishinde, CHernogoriyada ámelge asırılıp atırǵan reformalar menen tanısıw, mámleketler arasında tájiriybe almasıw, xalıqaralıq standartlar tiykarında qollanbalar islep shıǵıw hám aǵza mámleketlerdiń qánigeleri ushın pikirlesiw maydanın jaratıwdan ibarat boldı.
Ilajda 30 dan aslam mámleketten ámeliyatshı qánigeler hám ekspertler qatnastı. Májilis dástúriy hám onlayn formatta ótkerilip, Ózbekstannan 100 den aslam ishki auditor onlayn tárizde qatnastı. Qatnasıwshılar tárepinen berilgen sorawlarǵa xalıqaralıq qánigeler tárepinen hár tárepleme juwap berildi.
Májilis sheńberinde Xalıqaralıq ishki auditorlar institutınıń “Global ishki audit standartları”na tiykarlanıp islep shıǵılǵan PEMPALdıń mámleketlik uyımlar ushın ishki audit boyınsha úlgi qollanbası dodalandı hám oǵan tiyisli usınıslar kirgizildi.
Sonday-aq, nátiyjelilik auditin ámelge asırıw boyınsha Niderlandiya, Qubla Afrika Respublikası, Polsha hám Greciya tájiriybesi úyrenildi. CHernogoriyadaǵı mámleketlik ishki audit hám qadaǵalaw sistemasındaǵı reformalar hám olardıń basqıshları tallandı. Bar mashqalalar ámeliyatshı qánigeler hám xalıqaralıq ekspertler menen birgelikte kórip shıǵıldı.
Májilis dawamında qatnasıwshılar toparlarǵa bólinip, audit processlerinde ushırasatuǵın qıyın jaǵdaylardı dodaladı hám juwmaqlar islep shıqtı.
Turaqlılıq auditin shólkemlestiriw baǵdarında Ispaniya, Niderlandiya hám Qubla Afrika Respublikası tájiriybeleri tallandı. Bul baǵdarda arnawlı qollanba islep shıǵıw zárúr ekenligi atap ótildi.
Sonday-aq, BMShtıń Turaqlı rawajlanıw maqsetleri hám ESG – qorshaǵan ortalıq, sociallıq hám korporativ basqarıw auditin ámelge asırıw boyınsha Evropa mámleketleriniń tájiriybesi úyrenildi. Jańa audit túrleri arqalı mámleketlik uyımlardıń xalıqaralıq tendenciyalarǵa múnásibeti, ishki audit kadrlarınıń bilim hám mamanlıǵın arttırıw máseleleri boyınsha pikir alısıldı.
Májilis juwmaǵında PEMPALdıń úlgi qollanbası juwmaqlanıp, usınıslar tiykarında basıp shıǵarılıwı hám nátiyjelilik, turaqlılıq jáne ESG auditleri boyınsha tereńirek izertlewler alıp barılıwı boyınsha kelisimge erisildi.
Bul haqqında Ekonomika hám qarjı ministrliginiń málimleme xızmeti xabar berdi.

N.Ziyodullaeva, ÓzA