Búgin Qazaqstannıń Astana qalasında “Astana Mining & Metallurgy” 15-yubiley xalıqaralıq kán-metallurgiya kongressi óz jumısın basladı.

Bul abıraylı ánjumanda dúnya boylap kán-metallurgiya tarawına baylanıslı aldınǵı tájiriybe hám innovaciyalıq processlerdi dodalaw, tarawdaǵı áhmiyetli mashqalalar hám perspektivalı sheshimlerdi dodalawǵa ayrıqsha itibar qaratılmaqta.
Yubiley ánjumanında Ózbekstan Respublikası Taw-kán sanaatı hám geologiya ministrliginiń basqarma baslıǵı M.Bolibekov hám «Mineral resurslar institutı» mámleketlik mákemesiniń direktorı M.Isoqov qatnaspaqta.
Ánjuman sheńberinde shólkemlestirilgen «Xalıqaralıq birge islesiw: Geologiya xızmetleri májilisi» dep atalǵan panel sessiyasında ministrlik delegaciyasınıń wákilleri mámleketimizdegi kán-geologiya tarawında erisilgen jetiskenlikler, ámelge asırılıp atırǵan joybarlar hám xalıqaralıq birge islesiw perspektivalarına baǵıshlanǵan prezentaciya menen qatnastı.
– Bunday ánjumanlar tek ilimiy-izertlewde birge islesiwdi keńeytiw emes, al tarawdaǵı innovaciyalıq processlerdi úyreniw hám ámeliyatqa engiziw ushın áhmiyetli maydan esaplanadı. Biz prezentaciyamızda sońǵı jıllarda Ózbekstanda kán-geologiya tarawında ámelge asırılǵan reformalar, zamanagóy geologiyalıq izertlew texnologiyaları hám sırt elli birge islesiwshiler menen birgeliktegi joybarlar haqqında maǵlıwmat berdik. Bul tarawda xalıqaralıq sóylesiwdi jáne de tereńlestiriwge talap artıp barmaqta, – dedi «Mineral resurslar institutı» direktorı M.Isoqov.
Sonday-aq, kongress sheńberinde xalıqaralıq kórgizbe de shólkemlestirilgen bolıp, onda 13 mámleketten 40 tan aslam kompaniya óziniń kán-metallurgiya ónimleri hám texnikalıq sheshimlerin kórsetpekte.
Ministrliktiń málimleme xızmetine bola, usı kongresste Ózbekstannıń belsene qatnası mámleketimizdegi geologiya hám taw-kán tarawında ámelge asırılıp atırǵan reformalar, dúnya bazarındaǵı básekige shıdamlılıǵı hám xalıqaralıq birge islesiwge tayarlıǵın jáne bir márte kórsetti.

N.Ziyodullaeva, ÓzA