Múnásibet

Qaraqalpaqstan Respublikasın social-ekonomikalıq jaqtan rawajlandırıw, ekologiyalıq mashqalalardı saplastırıw hám xalıqtıń salamatlıǵın qorǵaw boyınsha húrmetli Prezidentimiz tárepinen bir qatar qarar hám pármanlar qabıl etilip, usı tiykarda orınlarda keń kólemli reformalar alıp barılmaqta. Tarawlardı rawajlandırıw baǵdarında alıp barılıp atırǵan keń kólemli jumıslardı en jaydırıw hám rawajlanǵan sırt mámleketler menen birge islesiwdi keńeytiw maqsetinde sırt el investorların tartıw boyınsha islenip atırǵan ilajlar baǵdarında da sońǵı waqıtlarda jańa baslamalar, jańa tabıslarǵa erisilmekte.
Usı jıldıń 22-may kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı Qaraqalpaqstan delegaciyası Prezidentimizdiń tapsırması menen Birlesken Arab Ámirliklerine barıwı respublikamız turmısındaǵı úlken tariyxıy waqıyalardıń biri boldı desek arzıydı.
Húrmetli Prezidentimiz hám Birlesken Arab Ámirlikleri basshılarınıń doslıq qatnasıqları menen sheriklik baylanısların jáne de bekkemlewge tiykar bolatuǵın áhmiyetli ushırasıw nátiyjeli kelisimlerge erisiliwi menen áhmiyetli bolmaqta.
Alıp barılǵan sóylesiwlerde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qaraqalpaqstan Respublikasınıń investiciyalıq potencialı, ekonomikalıq kórsetkishleri, perspektivalı xalıqaralıq joybarlardı ámelge asırıw boyınsha jaratılǵan sharayatlarǵa toqtap ótiwi álbette, sırt el investorların biyparıq qaldırmaydı.
Sapar sheńberinde «2 Point Zero» kompaniyasınıń atqarıwshı direktorı Maryam AlMxeiri menen ushırasıw ótkerilip, onda kompaniyanıń finanslıq xızmetler, jasalma intellekt texnologiyaları, áhmiyetli resurslar, sanlı transformaciya hám basqa da baǵdardaǵı tájiriybeler haqqında atap ótilip, birge islesiwdi jolǵa qoyıw boyınsha usınıslar bildirildi.
Sonday-aq, Qaraqalpaqstandaǵı bar kánlerde birgelikte geologiyalıq-izlew jumısların alıp barıw hám ekologiyalıq qáwipsiz ózlestiriw, eki mámleket universitetleri hám ilimiy mákemeleri menen birgeliktegi izertlew orayları hám kadrlar tayarlaw baǵdarlamaların shólkemlestiriw, respublikamızdıń turizm tarawında ele ashılmaǵan imkaniyatlardan paydalanıw máseleleriniń talqılanıwı jańa rawajlanıwlarǵa tiykar boları anıq.
Delegaciya aǵzalarınıń «Burjeel holdings» hám «Life Pharma» kompaniyaları wákilleri menen ótkerilgen ushırasıwda jetekshi integraciyalasqan mámleketlik emes medicinalıq xızmet kórsetiwshi kompaniyalardan biri bolǵan «Burjeel holdings» wákilleri menen sóylesiwler alıp barılıp, onda medicinalıq járdem tarawında qánigelerdi tayarlaw, diagnostika, profilaktika, densawlıqtı saqlaw tarawın sanlastırıw, jergilikli shıpakerlerdiń bilim-kónlikpelerin arttırıw boyınsha tájiriybe almasıwdı jolǵa qoyıw máseleleri talqılanıp, bul birge islesiwge jańa baǵdarlar ashılıwına tiykar boları anıq. Bunnan tısqarı, Qaraqalpaqstandaǵı hayallar arasında kókirek bezi ragı keselligin erte basqıshta anıqlaw maqsetinde mobil mammografiya úskenelerin jetkerip beriw hám joqarı tájiriybege iye qánigeler menen támiyinlew boyınsha kelisip alındı.
Sonday-aq, Nókis qalasında Birlesken Arab Ámirlikleriniń «Xalifa Bin Zayed Al Nahayan» fondı tárepinen 28 million dollar donorlıq qarjıları tiykarında «Ana hám bala» klinikası qurılıp atırǵan bolıp, bul klinikanıń jaqın arada pitkerilip paydalanıwǵa tapsırılıwı haqqında aytılıp, bul keleshek áwladtıń salamatlıǵın saqlaw baǵdarında xalqımızdıń turmısında quwanıshlı xabar bolıwı kútilmekte.
Qaraqalpaqstanda ósetuǵın, xalıqaralıq dárejede joqarı esportqa iye dárilik ósimliklerdiń biri bolǵan boyan tamırdı qayta islew hám farmacevtika tarawın rawajlandırıw boyınsha «Life Pharma» kompaniyası menen ótkerilgen ushırasıwda birgeliktegi joybarlardı ámelge asırıw sıyaqlı áhmiyetli máseleler kórip shıǵılıwı da tarawda jańa qádemler taslanıwı kútilmekte.
Eki el ortasındaǵı bul áhmiyetli ushırasıw Qaraqalpaqstan Respublikasınıń jaynap jasnawına, kánlerdi birgelikte geologiyalıq izlew jumıslarınıń ele de jetilistiriliwine, elimizde medicinanıń rawajlanıwına , Aralboyı regionında jasawshı ana hám balanıń salamat ósiwine, eki mámleket universitetleri hám ilimiy mákemeleri menen birgelikte birgeliktegi izertlew orayları hám kadrlar tayarlaw baǵdarlamaların shólkemlestiriwine, Respublikamızda turizm tarawınıń oǵada bay imkaniyatları bar ekeni hám onnan paydalanıw máselelerine salmaqlı úles kosatuǵınına isenemiz. Álbette, bulardıń bári Insan qádiri barlıq nárseden ústin turatuǵın elimizde erisilip atırǵan tabıslardıń tiykarı “Insan qádiri ushın” principi ushın xızmet eteri anıq.

Oralxan Saparova, Xalıq deputatları Nókis qalalıq Keńesiniń deputatı
Qaraqalpaqstan xabar agentligi