Watan hár birimizdiń turmısımız, táǵdirimiz, perzentlerimizdiń keleshegi, baxıtı hám keleshegi menen baylanıslı. Sol sebepli ósip kiyatırǵan áwladtı watansúyiwshilik, watanǵa sadıqlıq sezimlerinde kamalǵa keltiriw ayrıqsha áhmiyetke iye.

Bizge belgili, keyingi jılları Ózbekstan Respublikası Prezidenti, Qurallı Kúshler Joqarı Bas Sárkardası Shavkat Mirziyoevtiń baslaması tiykarında mámleketimizdiń qorǵanıw qábiletin bunnan bılay da arttırıw baǵdarında keń kólemli reformalar alıp barılmaqta.
Ásirese, sońǵı jılları mámleketimiz basshısınıń usınısı tiykarında tayarlanıp, elimiz boylap keńnen kórsetilip atırǵan «Watandı jırlaw» ádebiy-aǵartıwshılıq baǵdarlaması bul baǵdarda áhmiyetli orın iyelemekte. Ózbekstan Respublikası Qorǵanıw ministrligi, Mádeniyat ministrligi, Jazıwshılar awqamı, Kinematografiya agentligi hám basqa da shólkemler menen birgelikte tayarlanıp atırǵan bul baǵdarlamada joqarı watansúyiwshilik, mártlik hám erlik, tınıshlıq hám tatıwlıqtı qásterlep saqlaw, el-jurttıń abadanlıǵı ushın mobilizaciyalaw sıyaqlı pazıyletler tásirsheń usıllarda jırlanbaqta.
Paytaxtımızdaǵı «Túrkstan» kórkem óner sarayında ótkerilgen gezektegi «Watandı jırlaw» baǵdarlamasında da mine, usınday iygilikli túsinik hám qádiriyatlar, ibratlı pazıyletler ózine tán talqılawlarda sáwlelendirildi.
«Jańa Ózbekstan armiyası – mámlekettiń tiregi, xalqımızdıń maqtanıshı!» degen iygilikli ideya tiykarında tayarlanǵan bul retki baǵdarlama túri hám mazmunı jaǵınan jáne de jetilistirilip, kólemi hám qamtıwı keńeygeni itibarǵa ılayıq.
Saltanatlı ilajda paytaxtımızdaǵı «Jeńis parki» kompleksinde elimizdiń tınıshlıǵın hám onıń shegaralarına qol qatılmaslıǵın qorǵaw jolında qaharmanlarsha qaytıs bolǵan márt hám batır áskerlerdiń esteligine baǵıshlanǵan «Millet pidayıları» esteligi jáne Ekinshi jer júzilik urısta sawash maydanlarında mártlershe gúresken hám front artında miynet etken watanlaslarımızdıń teńsiz mártligin ulıǵlaytuǵın «Eslew nurı» kompoziciyası qurılısınıń ruwxıy turmısımızdaǵı áhmiyetin ashıp beretuǵın táreplerine ayrıqsha itibar qaratıldı.
Saltanatlı saray foyesinde shólkemlestirilgen áskeriy qural-jaraqlardıń maketleri, kórkem ádebiyatlar kórgizbesi ilaj qatnasıwshıları ushın temanıń ózine tán kiris sózi wazıypasın atqaradı.
«Watandı jırlaw» joybarınıń bul retki kórgizbe kúni de jetip keldi. Ózbekstan Respublikası Mámleketlik gimni jańlaydı.
Sahnaǵa áskeriy xızmetke shaqırılǵan jas áskerler óz sárdarları basshılıǵında shıǵıp keledi. Ilajdıń tolqınlandırıwshı máwritleri qatnasıwshılardıń qálbine ótkeni menen dıqqatqa ılayıq edi. «Watandı jırlaw» baǵdarlamasınan orın alǵan nama hám qosıqlar, saxnalıq kórinisler áskeriy xızmetkerlerdiń hám fizikalıq, hám ruwxıy jaqtan jetilisip, márt hám professional áskerlerge, haqıyqıy Watan qorǵawshılarına aylanıwına xızmet etiwi menen áhmiyetli bolıp esaplanadı.
Keshede Ózbekstan Qurallı Kúshlerindegi zamanagóy ózgerisler, «Xalıq penen armiya – bir tán, bir jan» degen iygilikli ideya, kóp milletli xalqımızǵa tán óz-ara awızbirshilik hám tatıwlıq sezimleriniń milliy armiyamız turmısında ayqın kózge taslanıp atırǵanı biytákirar poeziyalıq dóretpeler, dilbar qosıqlar, ájayıp ayaq oyınlar járdeminde ashıp berildi.
Áskerlerdiń tolqınlandırıwshı hám juwapkershilikli áskeriy jumısı, dúnya jámiyetshiliginen múnásip orın tawıp atırǵan janajan Ózbekstanımızdıń ǵárezsizligin, shegaralarımızdıń qol qatılmaslıǵın múnásip qorǵaw ushın zárúr áskeriy bilim hám kónlikpelerdi, atap aytqanda, zamanagóy málimleme-kommunikaciya texnologiyaları, jasalma intellekt tiykarların úyreniwi, zamanagóy qural-jaraqlardı basqarıwı tásirsheń kórinislerde sáwlelendi.
Baǵdarlama dawamında baqsılar tárepinen atqarılǵan ana-Watanımızdı ulıǵlawshı termeler, ullı ata-babalarımız – márt hám batır sárkarda Jalaladdin Manguberdi hám jáhángir Sahıpqıran babamız Ámir Temurdıń monologları, ózbek milliy ar-namısı hám maqtanıshı jırlanǵan, jadid aǵartıwshılarınıń elimizdiń rawajlanıwına erisiw jolındaǵı umtılısları sáwlelengen saxnalıq kórinisler, belgili dóretiwshiler hám talantlı shayırlardıń atqarıwındaǵı nama hám qosıqlar, áskeriy jámáátlerdiń shıǵıwları hesh kimdi biypárwa qaldırmadı.
Qorǵanıw ministrligi áskeriy xızmetkerleri tárepinen atqarılǵan jawıngerlik shaqırıq, «Jańa Ózbekstan Armiyası», «Men saqshıman», «Armiya hám tárbiya» sıyaqlı qosıqlar hám basqa da bir qatar qızıqlı muzıkalı-xoreografiyalıq shıǵıwları tamashagóyler tárepinen alǵıslar menen kútip alındı. Sonday-aq, «Nihol» sıylıǵınıń laureatı, Saidnosir Yigitaliev, talantlı qosıqshılar Shuhrat Daryo, Ǵaybulla Tursunov, Madina Fayzullaeva, Ótemis Jumaniyazov atqarǵan milliy hám klassikalıq qosıqlar ilajǵa payız baǵıshladı.
– Jigit adam qaysı tarawda jumıs alıp barmasın, Watandı qorǵawdı óz ómiriniń joqarı maqseti, ómir súreni, ar-namısı, abırayı, dep biledi, – dedi Mámleketlik salıq komitetiniń Bajıxana institutınıń kursantı Muhammadismoil Abdumannonov. – «Watandı jırlaw» dep atalǵan bul biytákirar baǵdarlamada usı tárepler óziniń ayqın kórinisin tapqanı menen dıqqatqa ılayıq.
Haqıyqatında da, biytákirar baǵdarlama dawamında tiyisli ministrlikler hám uyımlar jáne Jazıwshılar awqamı tárepinen «Márt áskerge sawǵa» dúrkininde basıp shıǵarılǵan jańa kitaplardıń prezentaciyası ótkerildi.
– «Watandı jırlaw» ádebiy-aǵartıwshılıq baǵdarlamasınıń prezentaciyası bárshege unadı, – dedi Ishki isler ministrligi akademiyasınıń kursantı Shohruh Nematov. – Bunday aǵartıwshılıq joybarlar Watanımızdı kózdiń qarashıǵınday qásterlep saqlaw baǵdarındaǵı ibratlı jumıslarǵa jáne de kóbirek shaqıradı.
Ádebiy-aǵartıwshılıq baǵdarlamanıń prezentaciyasında mámleketlik hám jámiyetlik ǵayratkerler, Qorǵanıw, Ishki isler, Ayrıqsha jaǵdaylar ministrlikleri, Milliy gvardiya, Mámleketlik qáwipsizlik xızmeti Shegara áskerleriniń áskeriy xızmetkerleri, sistemadaǵı áskeriy bilimlendiriw mákemeleriniń kursantları, huqıq qorǵaw tarawınıń student-jasları, dóretiwshi zıyalılar, ruwxıylıq úgit-násiyatshıları, ilim, mádeniyat tarawınıń wákilleri, ǵalaba xabar qurallarınıń xızmetkerleri, keń jámiyetshilik qatnastı.
Jaqın kúnlerde «Watandı jırlaw» aǵartıwshılıq baǵdarlaması Qaraqalpaqstan Respublikası, barlıq wálayatlarda, qala hám awıllarda, bilimlendiriw orınlarında, máhállelerde shólkemlestiriliwi názerde tutılmaqta.
Saltanatlı ilajǵa Ózbekstan Respublikası Prezidentiniń keńesgóyi Xayriddin Sultonov qatnastı.

Nazokat Usmonova,
ÓzAnıń xabarshısı