Nókis qalasında jeńil atletika boyınsha 15-17 jastaǵı jas óspirimler arasında «Jańa Ózbekstan Olimpiada shoqqıları» sport jarıslarınıń aymaqlıq basqıshı bolıp ótti.

Jarısqa Nókis qalası, Xojeli, Taqıyatas, Ámiwdárya hám Nókis rayonlarınan jas atletler qatnastı, bir qatar baǵdarlar boyınsha óz-ara keskin gúres alıp bardı.
Qızıqlı ótken bellesiwlerde Nókis qalası, Xojeli hám Ámiwdárya rayonları jaslarınıń jarısqa puqta tayarlıqlar kórgenligi ayqın kózge taslandı. Atap aytqanda, yadro ılaqtırıw boyınsha ul hám qız balalar arasında da ámiwdáryalı Dilafruz Yursinova hám Axrar Ataxanovtıń qolı bálent keldi.
100 metrge qızlar arasında tosıqlardı atlap juwırıwda Nókis qalasınan Ayzada Baxıtova, 110 metr aralıqta ul balalar arasında Xojeli sport mektebi tárbiyalanıwshısı Akmal Erimbetov jeńiske eristi. Uzınlıqqa sekiriwde nókisli Ayzada Baxıtova jáne bir altın medaldı óziniki etip alǵan bolsa, onıń komandalası Izzat Yuldashov ul balalar arasında teńsiz dep tabıldı.
Biyiklikke sekiriw, úsh atlap sekiriw túrlerinde Xojeli rayonınan kelgen Miyrigúl Sársenbaeva, Adilxan Karimov hám Baxit Orınbaevlar jeńimpazlıqtı qolǵa kirgizdi.
Nayza ılaqtırıw boyınsha er balalar arasında taqıyataslı Ǵayrat Muratbaev hám xojalshı Nigora Qoshmuratovlar altın medal iesine aylandı.
Ótkerilgen jarıs juwmaǵında jeńimpazlar shólkemlestiriwshiler tárepinen diplom, medal hám estelik sawǵaları menen sıylıqlanıp, “Jańa Ózbekstan Olimpiya shıńları” sport jarıslarınıń Qaraqalpaqstan Respublikası basqıshına jollamanı qolǵa kirgizdi.

Adilbay Orazov,
Qaraqalpaqstan xabar agentligi sholıwshısı