Nókis qalasındaǵı 23-sanlı ulıwma bilim beriw mektebiniń 4-“A” klass oqıwshıları ushın umıtılmas kún boldı. Sebebi, olar “Xosh bol, baslawısh klass!” atamasındaǵı bayram ilajında birinshi mektep basqıshı – baslawısh klasstı juwmaqladı.
Klass basshısı Gúlnara Kalbaeva tárepinen shólkemlestirilgen bul keshede oqıwshılar qosıq oqıp, ayaq oyınǵa túsip, saxnalıq kórinisler hám janlı qosıqlar arqalı bul ilajǵa jınalǵan ata-analarına, tuwısqanlarına úlken quwanısh baǵıshladı.

Ilaj dawamında balalar dáslepki ustazlarına hám ata-analarına minnetdarshılıq bildirdi. Mektep basshıları tárepinen oqıwshılarǵa estelik sawǵaları tapsırıldı. Olardıń jetiskenlikleri atap ótilip, kelesi bilimlendiriw basqıshında úlken tabıslar tiledi.
Bul ilaj oqıwshılar turmısındaǵı áhmiyetli basqıshlardan biri bolıp, olardıń mektepke bolǵan súyispenshiligin jáne de bekkemleydi. Endi olar jańa klassqa 5-klassqa qádem qoyıw aldında. Bayram bolsa júreklerde jıllı estelik sıpatında saqlanıp qaladı.

Biybisara Jartıbaeva, QMU 1-kurs magistrantı.
Qaraqalpaqstan xabar agentligi