Ózbekstan Respublikası Kámbaǵallıqtı qısqartıw hám bántlik ministri Botir Zohidov respublikamızǵa saparı etiw sheńberinde aymaqlarda jumıs orınların jaratıw, xalıqtı bánt etiw, kámbaǵallıqtı qısqartıw hám turmıs sharayatların jaqsılaw boyınsha alıp barılıp atırǵan jumıslar menen jaqınnan tanıstı.

Sapar Taxtakópir rayonınan baslandı. Ministr rayondaǵı “Ózbekstan” máhállesinde jaylasqan Sayxunabad tájiriybesi tiykarında jumıs alıp barıp atırǵan B.Usaqovtıń shańaraǵında ámelge asırılǵan jumıslar menen tanıstı. Bul shańaraqta xalıqtıń dáramatın arttırıw hám qıytaq jerlerden únemli paydalanıw boyınsha innovaciyalıq joybarlar ámelge asırılmaqta. Sonday-aq, rayondaǵı hákim járdemshileriniń ámelge asırǵan joybarları menen jaqınnan tanıstı.
Bunnan soń “Dáwqara” máhállesindegi “Qaratereń” ekoturizm kompleksi boyında ámelge asırılǵan jumıslardı kózden ótkerdi. Bul aymaqta ekologiyalıq teńsalmaqlılıqtı saqlaw, jergilikli turizmdi rawajlandırıw hám xalıqtı bánt etiw boyınsha ámelge asırılǵan ilajlar haqqında maǵlıwmatlar berildi.
Sapar dawamında qıytaq jerden únemli paydalanıp, shańaraqlıq dáramatların arttırıwda belsene qatnasıp atırǵan qıytaq jer iyeleri menen ashıqtan-ashıq sóylesiwler ótkerildi. Olar óz tájiriybeleri menen ortaqlastı, bar mashqalalar hám sheshimler haqqında pikir alısıldı. Ministrdiń bul ushırasıwları adamlardıń isbilermenlik kónlikpelerin arttırıw, óz miynetinen kóbirek dáramat alıw imkaniyatların keńeytiw ushın áhmiyetli qádem boldı.
Ministr respublikamızǵa saparı dawamında aymaqlardı sociallıq-ekonomikalıq rawajlandırıw, xalıqtı jumıs penen támiyinlew hám kámbaǵallıqtı qısqartıwǵa qaratılǵan ilajlardı jáne de kúsheytiw kerek ekenligin atap ótti. Sonday-aq, xalıqtıń usınıs hám baslamaların qollap-quwatlaw, isbilermenlikti rawajlandırıw hám jańa jumıs orınların jaratıw boyınsha qosımsha ilajlar dodalandı.
Keyingi mánzil Shımbay rayonı boldı.

Qaraqalpaqstan xabar agentligi