Shomanay rayonındaǵı Tazabazar mákan puqaralar jıyını aymaǵında jaylasqan jasıl qaplamalı maydanshada rayondaǵı awıl hám mákan puqaralar jıyınlarındaǵı shańaraqlardıń qatnasıwında “Salamat shańaraq ushın birleseyik!” súreni tiykarında sport jarısı ótkerildi.

Ilajǵa, rayon hákiminiń orınbasarı, shańaraq hám hayal-qızlar bóliminiń baslıǵı T.Qallıqılıchova, “Nuranıy” qorı rayonlıq bóliminiń baslıǵı D.Niyetullaev, Respublika ruyxıy-aǵartıwshılıq orayı rayonlıq bóliminiń baslıǵı I.Allaniyazov, Jaslar isleri agentligi rayonlıq bóliminiń baslıǵı F.Xodjabaevlar qatnastı.
Atap ótilgenindey, elimizde 15-may – Xalıqaralıq shańaraq kúni retinde keń túrde bayramlanadı. Shańaraqlardıń tınıshılıǵın, tatıwlıǵın, ata-analardıń perzent tárbiyasındaǵı juwapkershiligin arttırıw menen baylanıslı kóplegen ilajlardıń ótkeriliwi – bul elimizde shańaraqlarǵa qaratılıp atırǵan itibar hám ǵamxorlıqtıń anıq belgisi esaplanadı.
Sport jarısında belgilengen 3 shárt boyınsha shańaraqlar óz-ara bellesti.
Jarıs juwmaǵında Diyqanabad awıl puqaralar jıyınınan Xalmuratovlardıń shańaraǵı birinshi, Narbaevlardıń shańaraǵı ekinshi, Begjap awıl puqaralar jıyını aymaǵınan Ataniyazovlardıń hám Birleshik awıl puqaralar jıyını aymaǵınan Mamanovlardıń shańaraǵı úshinshi orındı jeńip alıwǵa miyassar boldı.
Jeńimpazlar shólkemlestiriwshiler tárepinen bahalı sawǵalar menen sıylıqlandı.

Qaraqalpaqstan xabar agentligi