Qaraqalpaqstan Respublikası Ministrler Keńesinde «Jańa Ózbekstan Olimpiada shoqqıları» sport jarısların ótkeriwge baǵıshlanǵan májilis bolıp ótti.

Májiliske ministrlik hám shólkem basshıları, qala hám rayon hákimleri menen tiyisli mákemlerdiń juwapker wákilleri qatnastı.
Ótkerilgen májiliste Qaraqalpaqstan Respublikası Ministrler Keńesi Baslıǵı Farhad Ermanov sońǵı jılları elimizde Prezidentimizdiń basshılıǵında sporttı, sonıń ishinde, balalar sportın rawajlandırıwǵa qaratılıp atırǵan itibar hám qollap-quwatlawlar haqqında aytıp ótip, mámleketimizde birinshi márte ótkerilip atırǵan «Jańa Ózbekstan Olimpiada shıńları» sport jarısı jaslarımızdıń óz sheberliklerin kórsetiwinde áhmiyetli orın tutatuǵınlıǵına ayrıqsha toqtaldı.
Májiliste tiykarınan respublikamız aymaqlarında jarıslardı ótkeriwge tayarlıq dárejesi, «Jańa Ózbekstan Olimpiada shıńları» sport jarısın Qaraqalpaqstan Respublikasında basqıshpa-basqısh shólkemlestiriw hám respublikalıq final basqıshına tayarlıq kóriw, jarıstıń ótkeriliw tártibi, sport inventarları menen támiyinleniwi, sportshılardı tayarlaw sisteması, jarıslarda respublikamız sportshılarınıń múnásip qatnasıwı hám ámelge asırılıwı tiyis ilajlar hár tárepleme kórip shıǵılıp, bul boyınsha tiyisli wazıypalar belgilep alındı.
Maǵlıwmat ushın aytatuǵın bolsaq, «Jańa Ózbekstan Olimpiada shoqqıları» sport jarısları 15-17 jastaǵı jaslar arasında sporttıń taekvondo WT, dzyudo, erkin gúres, grek-rim gúresi, jeńil atletika, stol tennisi, awır atletika, kórkem gimnastika hám basketbol 3×3 túrlerinen 3 basqıshta bolıp ótedi.
Jarıstıń wálayatlıq hám Qaraqalpaqstan Respublikası basqıshınıń jeńimpazları jıl juwmaǵında Tashkent qalasındaǵı Olimpiada qalashasında 3-basqısh sıpatında ótkeriletuǵın «Prezident olimpiadası» sport jarıslarında qatnasadı hám sport jarısları jeńimpazları bahalı sawǵalar menen sıylıqlanadı. Sonday-aq, birinshi hám ekinshi orındı qolǵa kirgizgen sportshılar Respublikalıq Olimpiada hám Paralimpiya sport túrlerine tayarlaw orayına qabıllanadı.

Adilbay Orazov,
Qaraqalpaqstan xabar agentligi sholıwshısı