9-may–«Eslew hám qádirlew kúni» hám Ekinshi jer júzilik urısta erisilgen jeńistiń 80 jıllıǵı múnásibeti menen Respublikalıq balalar málimleme-kitapxana orayında «Heshkim, hesh qashan umıtılmaydı!» atamasında saz-sáwbetli, mádeniy keshe bolıp ótti.

Keshege Awǵanstan urısı qatnasıwshıları, Nókis mámleketlik texnika universiteti student-jasları, mektep oqıwshıları, kitapxana xızmetkerleri hám keń jámiyetshilik wákilleri qatnastı.
Ilajdı Respublikalıq balalar málimleme-kitapxana orayı xızmetkeri Báhárgúl Mámbetkárimova ashtı hám basqarıp bardı.
Keshede Awǵanstan urısı qatnasıwshılarınan Maqset Sawqiev, Tasqınbay Bekimbetov, jurnalist Adilbay Orazovlar ilaj qatnasıwshıların bayram menen qutlıqlap, urıs jıllarında xalqımızdıń basına túsken qıyın kúnler, qaza bolǵan azamatlar tuwralı keń túrde aytıp berip, aldaǵı waqıtları hesh qashan dúnyada urıs bolmawın tiledi.
Ilajda qatnasıwshılar tárepinen keshe miymanlarına bir qatar sorawlar berilip, olarǵa juwaplar aldı.
Al, Xojeli rayonındaǵı 8-sanlı ulıwma orta bilim beriw oqıwshıları tárepinen tayarlanǵan koncert baǵdarlaması bolsa, keshege ózgeshe zawıq baǵıshladı.
-1987-jıldıń avgust ayınan 1989-jıldıń 14-fevralına shekem Awǵanstanda áskeriy xızmette boldım,-deydi Tasqınbay Bekimbetov.-Áskeriy xızmette bolǵan hár bir kún tek bizler ushın emes, ata-ana hám tuwǵan-tuwısqanlarımız ushın da oǵada qáweterli dáwir bolıp, onıń awır zardabın pútkil xalqımız bastan ótkerdi. Sonlıqtan bizler kórgen kúnlerdi jaslarımız hesh qashan kórmesin deymen. Ilayım, elimiz tınısh, xalqımız abadan bolsın!

Qaraqalpaqstan xabar agentligi