Shımbay rayonında 9-may – Eslew hám qádirlew kúni hám Ekinshi jer júzilik urıstaǵı jeńistiń 80 jıllıǵı múnásibeti menen Kónshi mákan puqaralar jıyını aymaǵındaǵı «Doslıq gúzarı» boyında jaylasqan «Hásiretli ana» esteliginde bayram ilajı bolıp ótti.

Ilajǵa rayon hákimi Aybek Tajetdinov, sektor baslıqları, nuraniylar xám keń jámiyetshilik wákilleri qatnastı.
Dáslep qatnasıwshılar «Hásiretli ana» esteligine gúl sheńberler qoydı. Bunnan soń ekinshi jer júzilik urısta qaza bolǵanlardıń ruwxına Quran oqıldı. Sonday- aq, urısta qaza tapqan hám urısqa qatnasqan márt azamatlarımızdıń dizimlerin kózden ótkerip, búgingi paraxat hám tınısh ómirimizdiń qorǵawshıların eske aldı.
Sonı maǵlıwmat ushın aytıp ótiwimiz kerek, bul joybar rayon hákimi Aybek Tajetdinovtıń tikkeley basshılıǵında shólkemlestirilip, bul jerde urıs qatnasıwshılarınıń dizimi óshpes altın háripler menen jazılǵan. Sonday-aq, «Hásiretli ana» esteligi ornatılıp,áskeriy texnikalar alıp kelindi. Bul áskeriy texnikalardı kórgen insanǵa, ásirese, jas awladlarımız urıstıń qanshelli qıyın dáwir ekenin seziniw hám tınısh zamanımızǵa , ashıq aspanımızǵa shúkirshilik penen qaraw kerekligin qayta- qayta esletedi.

Qaraqalpaqstan xabar agentligi