Mámleketimiz basshısı Xorezmdegi «Úrgensh klaster»diń jańa kárxanalarınıń jumısı menen tanıstı.

Klasterdiń shólkemlestirilgenine bes jıl bolǵan. Búgin ol paxta shiyki zatın jetistiriwden baslap tayar kiyim-kenshek tigiwge shekemgi barlıq processlerdi qamtıp alǵan bir pútin «shınjır». Onıń sistemasında 3 mıń adam jumıs penen támiyinlengen.
Isbilermen 8 mıń 500 gektar maydanda jetistirilgen paxtanı 100 procent qayta isleydi. Onıń ushın paxta tazalaw hám may zavodları bar.
Usı kúnleri klasterdiń jip-iyiriw hám gezleme toqıw quwatlılıǵı arttı. Qosımsha investiciya esabınan jáne eki kárxananıń jumısı jolǵa qoyıldı. Germaniya, Yaponiya hám Túrkiyadan zamanagóy úskeneler alıp kelinip ornatıldı.
Kárxanada oqıw-tájiriybe orayı shólkemlestirilgen. Tigiwshi hám dizayner-qánigeler aldın bul jerde oqıtılıp, keyin jumısqa jiberiledi.
Olardıń nátiyjesinde óndiris kólemi sezilerli arttı. Jılına 10 mıń 800 tonna átirapında iyirilgen jip hám 3 million dana tigiwshilik ónimlerin tayarlaw quwatlılıǵı jaratıldı.
Prezident Shavkat Mirziyoev jańa fabrikalarda bolıp, jumıs procesi, tayar ónimlerdi kózden ótkerdi. Tigiwshi hayal-qızlar menen sáwbetlesti. Olardıń aylıq miynet haqıları, miynet sharayatları menen qızıqtı.
Bul jerde tayarlanıp atırǵan joqarı sapalı kiyim-kensheklerdiń úlken bólegi eksportqa qaratıladı. Kárxananıń jıllıq eksport potencialı 28 million dollar átirapında.
Ónimlerdiń túri hám sapasın kóbeytip, eksport kólemin keńeytiw, energiyanı únemlew arqalı ónimniń ózine túser bahasın azaytıw boyınsha usınıslar berildi.

ÓzA