Moynaq rayonındaǵı Jayhun máhállesinde de áhmiyetli ilaj máhálle baslıǵın saylaw ótkerildi. Bul ilaj – xalıqtıń isenimi, belsendiligi hám puqaralıq poziciyası kórinetuǵın ilaj bolıp esaplanadı.

Saylaw procesinde talabanlar tanıstırılıp, hár biriniń tájiriybesi hám rejeleri tıńlandı. Xalıq saylawda belsene qatnasıp, óz máhállesiniń erteńgi kúnine tikkeley tásir etetuǵın qarardı ózleri shıǵardı.
Nátiyjede Gúlmira Tájibaeva eń kóp dawıs toplap, Jayhun máhállesiniń baslıǵı etip saylandı.
Atap ótilgenindey, bul jeńis – tek ǵana talabannıń emes, al máhálledegi hár bir hayal-qızdıń miyneti, hár bir puqaranıń iseniminiń nátiyjesi bolıp esaplanadı.
Saylaw – bul isenim, imkaniyat hám keleshekke ashılatuǵın esik. Búgingi kúnde máhálle baslıǵı sıyaqlı áhmiyetli lawazımlarǵa saylaw arqalı keliw – xalıqtıń ózin-ózi basqarıw procesine tartılatuǵının, ashıq-aydınlıq hám ádillik principleriniń engiziletuǵının kórsetedi.
Máhálle – bul jámiyettiń júregi. Jańa basshı – bul júrekke jańasha qan, jańa ruwx hám jańa maqset degeni. Jayhun máhállesi ushın bolsa bul jańa basqısh, jańa imkaniyatlar esigi bolıp esaplanadı.
G.Tájibaeva usı kúnge shekem máhálleniń hayal-qızlar belsendisi, Ózbekstan Xalıq demokratiyalıq partiyası belsendileriniń biri sıpatında xalıq iygiligi ushın jumıs alıp barǵan. Bul jumıslar – tájiriybe endi máhálleniń abadanlıǵı jolında jumsaladı.

Qaraqalpaqstan xabar agentligi