Xabarıńız bar, “Adolat” SDP óziniń Saylawaldı baǵdarlamasında xalıqtıń salamatlıǵın bekkemlew, ásirese, onkologiyaǵa baylanıslı awır keselliklerdiń aldın alıw hám erte anıqlaw máselesin tiykarǵı baǵdar sıpatında belgilegen.

Partiyanıń 2025-jılǵa mólsherlengen jumıs rejesi tiykarında Ózbekstan Respublikası Densawlıqtı saqlaw ministrligi menen birgelikte ámelge asırılıp atırǵan anıq hám mánzilli ilajlar házirgi waqıtta óz nátiyjesin bermekte.
Bul nárse “Adolat” SDP Siyasiy Keńesiniń baslıǵı Robaxon Mahmudovanıń qatnasıwında Tórtkúl rayonındaǵı “Yangiobod” máhállesi hayal-qızları ushın shólkemlestirilgen “Biz rak keselligine qarsı gúresemiz!” atamasındaǵı salamatlandırıw akciyasında jáne bir márte óz kórinisin taptı.
Xalıq wákilleriniń «Sawallandırıw aylıǵı» sheńberinde ótkerilip atırǵan medicinalıq tekseriwlerde belsene qatnasıwı, medicina xızmetkerleri menen pikirlesiwin jaqınnan baqlaǵan partiya jetekshisi tarawda jaratılǵan sharayatlar menen tanısıp, profilaktikalıq medicinalıq xızmetlerdiń áhmiyeti, olardı keńeytiw zárúrligi hám orınlarda medicinanıń sapasın jaqsılaw baǵdarındaǵı pikirleri menen ortaqlastı. Processte medicinalıq tekseriwden ótip atırǵan hayallar menen de sáwbetlesti.
Sonıń menen birge, “Adolat” SDP medicina mákemeleri menen birgelikte aymaqlarda ótkerip atırǵan bunday ilajlar arqalı hayal-qızlardıń onkologiyalıq keselliklerge shatılıw kórsetkishin azaytıw ushın isenimli hám jaqın jerdegi medicinalıq xızmetlerden paydalanıwın keńeytiw maqset etilgenin atap ótti.
Maǵlıwmat ushın, akciya sheńberinde 45 jastan 65 jasqa shekemgi 60 qa shamalas jergilikli hayal-qızlar onkologiyalıq kesellikler boyınsha mammografiya xızmeti arqalı maqsetli tekseriwden ótkerildi.
Bir sóz benen aytqanda, ótkerilgen bul akciya partiya Saylawaldı baǵdarlamasında belgilengen maqsetlerden kelip shıǵıp, medicina tarawın bunnan bılay da rawajlandırıw, sonıń ishinde, Aralboyı regionı xalqı ushın onkologiyalıq keselliklerdiń aldın alıw hám erte anıqlaw jáne profilaktika xızmetin shólkemlestiriw máselesine qaratıldı.

Qaraqalpaqstan xabar agentligi