Házirgi waqıtta Tashkent qalasında sambo boyınsha Aziya-Okeaniya chempionatı bolıp ótpekte.

Yunusabad sport komplkesinde ótkerilip atırǵan chempionatqa Aziya hám Okeaniya kontinetleriniń 25 ke shamalas mámleketinen 600 den aslam samboshılar qatnaspaqta. Jarıslar eresekler arasında sambo hám jawıngerlik sambo (erler hám hayal-qızlar), jaslar sambo hám jawıngerlik sambo (jigitler hám qızlar), jas óspirimler hám kadetler arasında (jigitler hám qızlar), kózi ázzi hám shala kóriwshiler arasında, sport sheberleri (veteranlar) arasında ótkerilmekte.
Jarıstıń keshe ótkerilgen kúninde qaraqalpaqstanlı belgili samboshı Shaxzada Azatova jawıngerlik sambo boyınsha óz qarsılasların jeńip shıǵıp, usı sport túrinen úshinshi márte Aziya- Okeaniya chempionı ataǵına miyasar boldı.
Sonı aytıp ótiwimiz kerek, sportshımız 2023-jılı Qırǵız Respublikasınıń Sholpan-ata qalasında ótkerilgen jáhán kubogi, 2024-jılı Qazaqastannıń Astana qalasında ótkerilgen jáhán chempionatlarında da altın medaldı jeńip alǵan edi. Sonday-aq, ol Jiu-jitsu boyınsha da Aziya chempionlıǵın qolǵa kirgiziwge erisken.

Adilbay Orazov,
Qaraqalpaqstan xabar agentligi sholıwshısı.