Qırǵızstan Sırtqı isler ministrligi Rossiya elshisine respublika puqaralarınıń Moskvada qamaqqa alınǵanın túsindiriwdi sorap, nota tapsırdı. Bul haqqında tuwısqan mámlekettiń sırtqı siyasat uyımınıń baspasóz xatkeri xabar berdi.

– Rossiya tárepine huqıq qorǵaw uyımları tárepinen ótkerilgen ámeliyat, sonday-aq, puqaralarǵa kúsh isletiwdiń tiykarı haqqında maǵlıwmat beriw, eger kúsh isletiw nızamsız bolsa, hádiyse boyınsha Moskva qalası huqıq qorǵaw uyımlarınıń wákillerine tiyisli shara kóriw talabı menen nota berildi, delingen bildiriwde.
Hújjette Qırǵızstan puqaralarınıń huqıqın qorǵaw, eki mámlekettiń qatnasıǵına zıyan keliwi múmkin bolǵan bunday jaǵdaylar tákirarlanbawı ushın ilaj kóriwi shárt ekeni atap ótilgen.
Málim etiliwinshe, 11-aprel kúni Moskvadaǵı «Bodrost» monshasında Qırǵız Respublikası puqaraları qolǵa alınǵan. Keyinirek Qırǵızstan Miynet ministrliginiń anıqlıq kirgiziwinshe, jámi uslanǵan 24 adamnan 20sı keyin qoyıp jiberlgen, 4 adam bolsa Rossiyadan deportaciya etilgen.

Qaraqalpaqstan xabar agentligi