Demokratiyalıq jámiyette saylawshılar óz wákilleriniń jumısın baqlaw hám bahalaw huqıqına iye. Usı kózqarastan, deputatlardıń óz saylawshılarına esap beriwi úlken áhmiyetke iye. Bul process tek ǵana deputattıń juwapkershiligin arttırıp qoymastan, al saylawshılar menen ashıq hám nátiyjeli baylanıstı támiyinlep, bildirilgen isenimdi tolıq aqlaw jolında jumısın tallaw imkaniyatın beredi.

Nókis qalası “Qutlı mákan” MPJ aymaǵında jaylasqan 35-sanlı ulıwma bilim beriw mektebinde partiyamız belsendisi, Qaraqalpaqstan Respublikası Joqarǵı Keńesiniń deputatı Murat Atamuratovtıń saylawshılar menen ushırasıwı da joqarıdaǵı máseleler boyınsha áhmiyetli boldı.

Dáslep ilajda shıǵıp sóylegen “Qutlı mákan” MPJ baslıǵı Zamira Qutlımuratova sońǵı jılları mámleketimizde ámelge asırılıp atırǵan reformalar haqqında sóz etip, deputatlar xalıq wákilleri sıpatında óz saylawshıları aldında esap beretuǵınlıǵı, olardıń jumısı saylawshılar tárepinen bahalanıtuǵını álbette, esabat berip atırǵan deputat penen birgelikte onıń partiyası ushın da birdey áhmiyetli ekenligin atap ótti.

Deputat saylanǵan 2-sanlı “A.Dosnazarov” saylaw okrugi jaylasqan aymaqtaǵı mákan puqaralar jıyınları juwapkerleri hám saylawshılar, sonday-aq, mámleketlik hám mámleketlik emes shólkem wákilleri, jámiyetlik belsendiler, nuraniylar qatnasqan ilajda deputat Murat Atamuratovtıń 2025-jıldıń birinshi sheregindegi jumısı boyınsha esabatı tıńlandı.

Atap ótilgenindey, esabat dáwirinde deputat óz jumısın mámleketimiz nızamshılıǵınıń tiykarı – Ózbekstan Respublikası Konstituciyası, onnan kelip shıǵatuǵın normativlik-huqıqıy hújjetler hám partiyanıń Saylawaldı baǵdarlamasında belgilengen “Reforma reforma ushın emes, insan mápleri ushın” principin turmısqa engiziw, xalıqtıń bántligin hám real dáramatların izbe-izlik penen arttırıw, sociallıq taraw, puqaralardıń densawlıǵın saqlaw sistemasın túp-tiykarınan jetilistiriw, infrastrukturanı jetilistiriw, ilim hám bilimlendiriw tarawın rawajlandırıw, shańaraqtı, mámlekettiń jaslar siyasatın bekkemlew boyınsha tiykarǵı maqsetler tiykarında nátiyjeli shólkemlestirip, bul baǵdarda salmaqlı nátiyjelerge erisken.

Sonıń ishinde, deputat tárepinen ótken dáwirde 50 den aslam puqaralardıń múrájatları boyınsha qabıllawlar shólkemlestirilip, xalıqtıń bir qatar narazılıqlarına sebep bolǵan máselelerge unamlı sheshim tabılǵan.

Sonıń menen birge, aymaqtaǵı máhállelerdiń kósheleri, trotuar jolları hám olardaǵı jaqtılandırıw sistemalarında anıqlanǵan kemshilikler boyınsha saylawshılardıń deputatımızǵa etken múrájatları tiyisli tártipte shólkemlestirilgen ámeliy ilajlar nátiyjesinde izbe-izlik penen saplastırılǵan.

Baslamashı deputatımızdıń jumısına baǵıshlanǵan esabat ilajı onıń aymaqtaǵı kóplegen máselelerde saylawshılardıń isenimin aqlawı, xalıqtı razı etiwge qaratılǵan ámeliy jumısları menen áhmiyetli boldı. Qalaberdi, keleshektegi áhmiyetli wazıypalar hám maqsetler boyınsha óz-ara pikir alısıldı.

Sonday-aq, deputat 2025-jıldaǵı rejeler, máhálle xalqın qıynap atırǵan mashqalalar menen de ortaqlastı. Kóp jıllardan berli itibardan shette qalıp kiyatırǵan ishki kóshelerge asfalt tósew, gónergen sım aǵashlardı jańasına almastırıw, transformator ornatıw, qıytaq jerlerdi suwǵarıw hám kadastr máseleleri, máhálledegi “Gúljan,” “Ayazqala,” “Tolıskól,” “Júyrikbas,” “Náwshe” hám “A.Oteniyazov” kósheleriniń boyına svetofor, piyadalar ótiw jolı hám tezlikti páseytiwshi ótiw jolın ornatıw hám 35-sanlı mektepke zamanagóy asxana qurıp beriw boyınsha múrájatlardıń sheshimi úyrenildi.

Esabat ushırasıwı dawamında xalıqtıń mashqalaları hám múrájatları boyınsha juwapker shólkemlerge tapsırmalar berilip, ámeliy járdemler kórsetildi.

Álbette, deputattıń jumısına haqıyqıy bahanı saylawshılar beredi. Ilajda shıǵıp sóylegen aymaqtaǵı MPJ baslıqları hám saylawshılar deputat Murat Atamuratovtıń jumısın unamlı bahalap, onıń ótken dáwirdegi iskerligine baylanıslı bir qatar unamlı mısallardı atap ótti.

Xalıq wákili búgingi jańalanıw hám ózgerisler procesinde belsene qatnasıp, ayırım taraw hám sistemalarda jol qoyılıp atırǵan qáte-kemshiliklerdi saplastırıwda, elektorat mápin qorǵawda óz moynındaǵı juwapkershilikti nátiyjeli atqarmaqta.

Qaraqalpaqstan xabar agentligi