Ózbekstan Respublikası Prezidentiniń 2023-jıl 24-maydaǵı «Sanlı xızmetlerge qamtıwdı hám sapasın arttırıw jáne taraw, tarmaq hám aymaqlardı sanlı tranformaciyalaw ilajları haqqında”ǵı qararı tiykarında balalardı sawallandırıw orınlarına jollamalardı ashıq hám qolaylı túrde onlayn satıw hám bul processte korrupciyalıq faktorlardı saplastırıw maqsetinde, «Oromgohlar.uz» elektron platforması islep shıǵıldı hám ótken jılı sınaq túrinde iske túsirilip, arttırılǵan tájiriybe tiykarında jáne de jetilistirildi.

Usıǵan tiykarlanıp, bıyılǵı jılı dem alıw oraylarına jollamalardı tolıǵı menen onlayn arqalı ámelge asırıw rejelestirilgen.
Ózbekstan kásiplik awqamları Federaciyası Qaraqalpaqstan Keńesinde bolıp ótken seminar-treningte áne, usı máseleler hár tárepleme dodalanıp, qánigeler tárepinen qatnasıwshılarǵa keń túrde túsinikler berildi. Seminarda Ózbekstan kásiplik awqamları Federaciyası Qaraqalpaqstan Keńesi baslıǵınıń orınbasarı M. Daniyarov, Departamenttiń aymaqlıq basqarma baslıǵı S. Ótewliev, tarmaqtıń juwapker shólkemleri basshıları, komitet, keńes baslıqları hám esapshıları, “Ózneftegaz”, “Hududiy elektr tarmoqlari”, Máhálleller assosaciyası hám mektepke shekemgi hám mektep bilimlendiriwi ministrliginen tiyisli wákiller qatnastı.
Seminar-treningte balalardı sawallandırıw oraylarınıń jollamaların elektron platformaǵa jaylastırıw, onı satıp alıwdı fizikalıq hám yuridikalıq tárepler arqalı onlayn ámelge asırıw, esabat hám statistikalıq maǵlıwmatlardı elektron bazadan alıw qaǵıydaları túsindirildi.
Sonday-aq, ilajda Balalardıń dem alısın hám sawallandırıwın shólkemlestiriw departamenti direktorınıń qarjı-ekonomikalıq máseleler boyınsha orınbasarı O. Mirzamahmudov , departamentning marketing hám sawda bólimi baslıǵı E. Murodova, bólimniń bas qánigesi S. Bekovalar da shıǵıp sóylep, balalardıń jazǵı dem alısın mazmunlı shólkemlestiriw boyınsha ózleriniń pikir-usınısların bildirdi.
Seminar juwmaǵında, qatnasıwshılar tárepinen platformanıń imkaniyatları boyınsha unamlı pikirler bildirildi hám búgingi kúni sanlı texnologiyalar tiykarında balalardıń dem alısı tarawındaǵı jumıslardı nátiyjeli shólkemlestiriw ushın “Oromgohlar.uz” platforması áhmiyetli qural ekenligi atap ótildi.

Qaraqalpaqstan xabar agentligi