Búgingi kúnde mámleketimizde jaslar máselesine úlken itibar qaratılmaqta. Sebebi, jaslar keleshegimizdiń tiykarı, erteńgi kúnimizdiń qurıwshıları.

Tórtkúl rayonı hákimi R.Shamuratovtıń basshılıǵında «Hákim hám jaslar» ushırasıwı bolıp ótti. Onda hákim rayondaǵı talapshań, aqıllı jaslardıń sanı kúnnen-kúnge artıp atırǵanın maqtanısh penen atap ótti.
«Jas kitapqumar» tańlawınıń respublikalıq basqıshında 1-orındı iyelegen «Kelteminar» awılındaǵı 10-sanlı mektepti tamamlaǵan hám házirgi waqıtta Ózbekstan Mámleketlik jáhán tilleri universitetiniń 2-basqısh studenti Xoldurdieva Ogiljeren Abajon qızı Prezident sawǵası “BYD Chazor” elektromobili menen sıylıqlanǵan edi.
Ushırasıwda O.Xoldurdieva hám onıń ákesi A.Soyunov penen bir qatarda jeńimpazdıń ustazları shıǵıp sóyledi. Olar jaslarǵa jaratılǵan usınday imkaniyatlar ushın mámleketimiz basshısına minnetdarshılıq bildirdi hám jaslardı kitap oqıwǵa shaqırdı.
Sonday-aq, ótkerilgen ilaj dawamında mámleketimizdegi qábiletli jaslardı hár tárepleme qollap-quwatlaw maqsetinde shólkemlestirilgen “Ulıǵbek” qorı, Innovaciyalıq rawajlanıw ministrligi hám Jaslar isleri agentligi tárepinen shólkemlestirilgen intellektuallıq bellesiwdiń “Mırza Ulıǵbek miyrasxorları” tańlawınıń rayonlıq basqıshı jeńimpazları da sıylıqlandı.

Qaraqalpaqstan xabar agentligi