Shigit egisiniń baslanıwı awıl xojalıǵı tarawındaǵı áhmiyetli waqıya bolıp, diyqanlardıń miynetiniń nátiyjesi kútkenindey jaqsı, zúrááttiń mol bolıwına, xalıqtıń abadanlıǵınıń artıwına úmit baǵıshlaydı.

Shomanay rayonındaǵı Begjap awıl puqaralar jıyını aymaǵındaǵı “Baxram ilǵor” fermer xojalıǵında bıyılǵı shigit egisiniń baslanıwına baǵıshlanǵan kórgizbeli seminar ótkerildi.
Seminarǵa Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, rayon hákimi A.Ametov hám fermer xojalıqlarınıń baslıqları qatnastı.
Sózge shıqqanlar Prezidentimizdiń tarawǵa qaratıp atırǵan dıqqat-itibarı, berilgen imkaniyatlardı birme-bir tilge alıp, shigit egiwdiń sapasına baylanıslı áhmiyetli wazıypalardı atap ótti. Fermerlerdiń egis máwsiminde óz jumıslarına juwapkershilik penen qarawı hám eń zamanagóy texnologiyalardı qollanıwı boyınsha pikir-usınıslar bildirilip, áhmiyetli wazıypalar atap ótildi.
Bunnan soń, seminar qatnasıwshıları jaqsı niyetler menen dáslepki tuqımlardı sewdi.
Maǵlıwmat ushın, bıyıl rayonda jámi 4800 gektar maydanǵa shigit egiw rejelestirilgen. Sonnan 1860 gektarına Qıtay texnologiyası tiykarında shigit egilip, paxta jetistiriw jolǵa qoyıladı. 900 gektarına sırt el sortları hám 960 gektarına jergilikli sortlar egiledi.
Shigit egiw jumısların shólkemleskenlik penen alıp barıw maqsetinde 8 otryad dúzilgen hám olarǵa 51 súrim traktorı, 161 qatar araların islew traktorı, 52 shigit egiw seyalkası, 15 jer tegislewshi hám 212 mexanizator biriktirilgen. Bul egis procesiniń tabıslı ámelge asırılıwına kepillik beredi.

Qaraqalpaqstan xabar agentligi